Ábenov Qazaqstandaǵy mınıstrlikter jumysy halyqqa nelikten túsiniksiz ekenin aıtty
«Ókinishke qaraı, qazirgi kezde memlekettik organdarda memlekettik tilde aqparat beretin, qazaqsha saýatty sóıleıtin azamattar joq ekeni aıtylyp júr. Meniń oıymsha, muny da mindetteý kerek dep esepteımin. Sebebi, memlekettik organ bıýdjetten qarjy alyp, azamattaryna qazaq tilinde tıisti deńgeıde aqparat taratpaıtyn bolsa, olardyń barlyq jumystary bosqa ketedi. Sondyqtan memlekettik tilde aqparat berý máselesinde buqaralyq aqparat quraldarynda, onyń ishinde teledıdar arqyly óz pikirin jetkize alatyn adamdardyń bolýy máselesin arnaıy qaraý kerek dep oılaımyn»,-dedi M. Ábenov.
Qazirgi kezde qoǵam ózgergenin jáne demografııalyq ózgerister bar ekenine toqtalǵan ol, osy rette qazaq tilinde aqparat alatyndar sany qarqyndy túrde kóbeıgenin atap ótti. Alaıda, memlekettik organdar tarapynan aqparatty qazaq tilinde taratý júıesi qaralmaǵan.
Ábenovtiń paıymynsha, bul óz kezeginde memlekettik organdar júrgizip jatqan jumystardyń halyqqa tıisti deńgeıde jetkizilmeýi máselesin týdyryp otyr.
«Atap aıtqanda, kóbinese mamandar nemese sarapshylar orys tilinde sóıleıdi. Bul turǵyda arnaıy daıyndyq jumystaryn júrgizbese bolmaıdy. Qazir vedomstvolar bir tilde, al halyq kóp jaǵdaıda memlekettik tilde sóıleıdi. Sondyqtan da ekeýin jaqyndatý máselesin qarastyrsaq, oryndy bolar edi, múmkin tıisti tapsyrmalardy júkteý kerek shyǵar nemese memlekettik organdardyń baspasóz qyzmetterin oqytý sharalaryn eskergen jón bolar. Sonymen qatar bul baǵytta arnaıy adamdardy daıarlaý máselesin de qamtyǵan durys bolar. Jasalyp jatqan jumystar kóp, biraq halyqqa túsindiretin adam az. Kóp jaǵdaıda iske asyrylǵan sharalardy jetkilikti aıta almaımyz nemese aýdarma tilde qate jetkizemiz. Aqparattyq saıasatta utylyp jatqan tusymyz ol azamattarǵa durys túsindire almaýǵa baılanysty bolyp otyr»,-dedi ol.
