Abelardo de la Esprıelıa Kolýmbııa prezıdenti qyzmetine kiristi
ASTANA. KAZINFORM — Kásipker ári saıasatker Abelardo de la Esprıelıa Kolýmbııanyń jańa prezıdenti retinde ant qabyldady. Inaýgýratsııa rásimi Caracol telearnasynda tikeleı efırde kórsetildi, dep habarlaıdy TASS.
— Ant etemin jáne Kolýmbııanyń Konstıtýtsııasy men zańdaryn adal saqtaýǵa halyq aldynda ýáde beremin, — dedi memleket basshysy parlament músheleriniń qatysýymen ótken rásimde.
Inaýgýratsııa Kolýmbııa astanasynda emes, eldiń batysyndaǵy Kalı qalasynda ótti. Rásimge Argentına prezıdenti Haver Mıleı, Chılı prezıdenti Hose Antonıo Kast jáne Ekvador prezıdenti Danıel Noboa da qatysty.
De la Esprıelıa 21 maýsymda ótken prezıdent saılaýynyń ekinshi týrynda jeńiske jetti. Ol saılaýshylardyń 49,6 paıyzynyń qoldaýyna ıe bolyp, sol kezde bılikte bolǵan solshyl «Tarıhı pakt» partııasynyń ókili Ivan Sepedýdan 1 paıyzdyq tarmaqqa ozyp ketti. Sepedý 48,7 paıyz daýys jınaǵan.
Saılaýaldy naýqan kezinde de la Esprıelıa ózin qalyptasqan saıası júıege qatysy joq saıasatker retinde kórsetti jáne prezıdenttikke «solshyl kúshterdiń eldi kúıretýine jol bermeý úshin» bara jatqanyn málimdedi. Memleket basshysy qyzmetindegi negizgi mindeti retinde qylmys pen esirtki bıznesine qarsy kúresti atady. Jańa prezıdent qarýly toptarmen jáne esirtki kartelderimen kez kelgen kelissóz júrgizýge qarsy.
Ekonomıkalyq ósimdi yntalandyrý úshin de la Esprıelıa memlekettik shyǵyndardy aıtarlyqtaı qysqartýǵa, bızneske túsetin salyq júktemesin azaıtýǵa, qazba otyn óndirý kólemin arttyryp, onyń eksportyn ulǵaıtýǵa ýáde berdi.
Syrtqy saıasatta ol AQSh-pen áskerı yntymaqtastyqty nyǵaıtýdy qoldaıdy jáne amerıkalyq áskerı kúshterdiń esirtki kartelderiniń zerthanalaryna jasalatyn soqqylarǵa qatysý múmkindigin qarastyrýǵa nıetti.
De la Esprıelıa Gýstavo Petro úkimeti Gaza sektoryndaǵy qaqtyǵys aıasynda 2024 jylǵy mamyrda úzgen Izraılmen qarym-qatynasty qalpyna keltirýdi josparlap otyr. Sondaı-aq Kýba men Nıkaragýadaǵy Kolýmbııa elshilikterin jabýdy kózdeıdi.
Aıta keteıik, maýsym aıynda Kolýmbııanyń Ulttyq saılaý keńesi (CNE) ońshyl kandıdat Abelardo de la Esprıelıany prezıdent saılaýynyń jeńimpazy dep resmı túrde jarııalaǵan bolatyn.
