Abel Sanches Golovkınniń qarsylasy kim bolýy múmkin ekenin aıtty
ASTANA. QazAqparat - Orta salmaqtaǵy WBA jáne IBO nusqalary boıynsha álem chempıony Gennadıı Golovkındi jattyqtyratyn amerıkalyq bapker Abel Sanches radıoefırde Gennadııdiń qarsylasy kim bolýy múmkin ekenin aıtty.
Bul týraly sports.kz habarlady.
«Mamyr aıynda Gennadıı Golovkınmen básekelese alatyn birneshe boksshy bar. Bizdiń boksshy qazir 32 jasta, al kelesi kezdesýge deıin ol 33 jasqa tolady. Bıyl 4 kezdesý ótkizýdi josparlap otyrmyz. Belgili boksshylarmen kezdese almasaq, reıtıngtiń joǵary jaǵynda ornalasqandarmen kúsh synasamyz. Ǵalamtorda jıi kezdesetin úsh-tórt esimdi aıta alamyn. Olar: Vıllı Monro, Týreano Djonson jáne WBC reıtınginde úshinshi orynda turǵan Argentına ókili Horhe Heıland. Eger olar reıtıngte alǵa qaraı qadam bassa, onda Golovkınmen kezdese alady. Olardyń mundaı múmkindikke ıe bolýyna biz qarsy emespiz. Golovkınmen judyryqtasýdan bas tartsa, reıtıngtegi kelesi adammen kúsh synasamyz», - dedi Sanches.
Eske sala keteıik, ótken aıdyń sońynda 11 raýndta Martın Mıýrreıdi tize búktirgen Gennadıı chempıondyq ataǵyn sátti qorǵady.
