Abel Sanches Golovkın úshin ortasha salmaqtaǵy eń qaýipti qarsylasty atady
ASTANA. QazAqparat - Qazaqstandyq boksshy Gennadıı Golovkınniń jattyqtyrýshysy Abel Sanches qaramaǵyndaǵy sportshy úshin ortasha salmaqta eń qaýipti qarsylas - AQSh boksshysy Pıter Kýıllın ekenin atap ótti, dep habarlaıdy boxingscene.com.
Suhbattardyń birinde GGG-ǵa kóp problema ákele alatyn kim degen suraqqa Abel Sanches kenetten álemniń burynǵy chempıony Pıter Kýıllınniń esimin atady.
«Judyryqtasý stıli jaǵynan dál osy Kýıllın Golovkınge kúrdeli problemalar ákelýi múmkin. Alaıda olardyń jekpe-jeginiń ótkizilýi ekitalaı. Árıne, bári de Pıterge baılanysty. Biraq ol tym úlken gonorar - 5 nemese 10 mıllıon surap otyr. Alaıda onyń bir jekpe-jek úshin tabysy 500 myń dollardan ázer asqan», - dedi Sanches.
Eske sala keteıik, ótken demalysta Nıý-Iork qalasynda Golovkın Kanada boksshysy Davıd Lememen rıngte kezdesip, segizinshi raýndta merziminen buryn jeńiske jetken bolatyn. Sol arqyly ózinde buǵan deıin bolǵan WBA (Super), IBO jáne WBC (Interim) tujyrymdamalary boıynsha tıtýldaryna buǵan deıin kanadalyq sportshynyń enshisinde bolǵan IBF belbeýin qosyp aldy. BAQ-tyń aqparatynsha, bul jekpe-jek 150 myńǵa jýyq PPV jınaǵan.
Bul Golovkınniń mansabynda 34-shi jeńis boldy, sonyń 31-in ol nokaýtpen aıaqtaǵan. Sondaı-aq qazaqstandyq sportshy merziminen buryn qol jetkizgen jeńister toptamasyn 21-ge deıin kóbeıtti.
