Abel Sanches «Big Bear» jattyǵý bazasyndaǵy Golovkınniń bólmesin kórsetti
ASTANA. QazAqparat - Jerlesimiz Gennadıı Golovkınniń bapkeri Abel Sanches «Big Bear» jattyǵý bazasynda jýrnalıster úshin shaǵyn ekskýrsııa uıymdastyrdy. Eske sala keteıik, qazaqstandyq Gennadıı Golovkın brıtandyq qarsylasy Martın Mıýrreımen bolatyn kezekti jekpe-jegi úshin atalǵan bazada daıyndyqqa kirisken edi. Ekskýrsııa barysynda bapker Sanches bazada jattyǵatyn onshaqty boksshynyń kúndelikti tirshilik jaǵdaıyna jan-jaqty toqtala kele, amerıkalyq jýrnalısterdiń ótinishine oraı Gennadııdiń bólmesine jeke toqtalyp ótti, dep habarlaıdy boxingnews.kz.
Siltemedegi beınematerıalǵa qaraǵanda Genanyń bólmesi bazanyń turǵyn úı ǵımaratynyń ekinshi qabatynda ornalasqan. Sosyn qazaqstandyq boksshynyń qaı bólmede ornalasqanyn tabý esh qıynǵa soqpaıtyny anyq, óıtkeni onyń nomerindegi esikte áıgili «GGG» jazýy bar. Bapkerdiń sózine qaraǵanda, jerlesimizdiń bólmesi tek onyń jeke ózine ǵana arnalǵan, ıaǵnı basqa boksshylardikindeı emes, Gena atalǵan bazada bolmaǵan kúnniń ózinde onyń bólmesi eshkimge jalǵa berilmeıdi. Baqsaq Genanyń nómiri qarapaıymdylyǵymen de ereksheledi eken, onda eki kereýet, shkaf pen jýynatyn bólmeden basqa basy artyq zat joq. Aıtpaqshy, WBC (Interim) nusqasy boıynsha Gennadııge tıesili chempıondyq belbeý de osy bazadaǵy bólmesinde saqtalyp tur.
Áńgime barysynda bapker Sanches Monakada 21-aqpanda josparlanǵan Martın Mıýrreıden keıin Genanyń kezekti jekpe-jegi kimmen ótetini týraly tis jarǵan joq. «Men - bapkermin, meniń isim boksshyny daıarlaý. Sondyqtan da, Mıýrreıden soń Gennadııdiń kimmen kezdesetinin bilmeımin. Al bul úshin Tom Leffler men aǵaıyndy Germandar bar emes pe», - deıdi Sanches.
