Ábdiqalyqova Týberkýlezdi baqylaý jónindegi halyqaralyq konferentsııaǵa qatysty
ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova Týberkýlezdi yqpaldastyra baqylaý jónindegi halyqaralyq konferentsııa jumysyna qatysty.
Bul týraly Aqordanyń baspasóz qyzmetinen málim etti.
Іs-sharaǵa Qazaqstan Respýblıkasy Densaýlyq saqtaý jáne áleýmettik damý mınıstri Tamara Dúısenova, DDU Týberkýlez jónindegi bıýrosynyń kóshbasshysy Masýd Dara, Jahandyq qordyń óńirlik menedjeri Nıkolıa Kanto, Koreıanyń Týberkýlez ınstıtýtynyń dırektory Hı Djın Hım, RF Densaýlyq saqtaý mınıstrliginiń shtattan tys bas ftızıatry Irına Vasıleva, QR-daǵy AQSh Elshisi Djordj Krol, AQSh-tyń Halyqaralyq damý jónindegi agenttiginiń, QR Qyzyl Aı Qoǵamynyń ókilderi, sheteldik jáne qazaqstandyq jetekshi ǵalymdar, ftızıatrlar men sarapshylar qatysty.
Konferentsııanyń basty maqsaty týberkýlezdi baqylaýdy yqpaldastyra júrgizý, atap aıtqanda medıtsınalyq-sanıtarlyq alǵashqy kómek uıymdary deńgeıinde týberkýlezdi dıagnostıkalaýdyń jáne emdeýdiń jedeldetilgen ádisterine qoljetimdilik aıasyn keńeıtý, patsıentter men dárigerlerdiń ózara teń jaýapkershilikterin arttyrý bolyp sanalady.
Konferentsııada sóz sóılegen G.Ábdiqalyqova BUU-nyń Myńjyldyq maqsattarynyń biri - týberkýlezdiń taralýyn toqtatýǵa jáne 2015 jylǵa qaraı aýrý-syrqaýdy azaıtý úrdisine álemdik qoǵamdastyq qol jetkizgenin atap ótti. Nátıjesinde 2000 jyldan bastap týberkýlezben aýyrý 18%-ǵa tómendedi. Búginde ornyqty damý maqsattaryndaǵy mindetterdiń biri retinde aıqyndalǵan «2030 jylǵa qaraı týberkýlez indetin túbegeıli joıý» álemdik qoǵamdastyqtyń kún tártibinde tur.
Sondaı-aq, G.Ábdiqalyqova Qazaqstannyń táýelsizdik jyldary qol jetkizgen densaýlyq saqtaý salasyndaǵy jetistikterine toqtaldy. Memlekettik hatshy «Qazaqstan-2050» uzaqmerzimdi strategııasynda Memleket basshysy medıtsınalyq kómektiń qoljetimdiligi men sapasynyń deńgeıin arttyrý úshin qajetti jaǵdaılar jasaý mindetin alǵa qoıǵanyn aıtty.
Memlekettik hatshy elimizde týberkýlezge qarsy kúrestiń joǵary deńgeıde uıymdastyrylǵan júıesi qalyptastyrylǵanyn atap ótti. Ol densaýlyq saqtaýdyń jáne áleýmettik qamsyzdandyrýdyń barlyq qyzmetteri túrin qamtıdy.
BDU standarty - 85% jaǵdaıynda týberkýlezben aýyratyn naýqastardy emdeý tıimdiligi 87,6% boldy, BDU standarty - 85% jaǵdaıynda kóptegen dárilerge kónbeıtin týberkýlezben naýqastanǵandar arasynda - 75,1%-dy qurady. Kórsetilgen is-sharalardy júzege asyrý halyqtyń arasyndaǵy aýrý-syrqaýdy 1,5 ese (100 myń halyqqa shaqqanda 2011 jylǵy 86,6-dan 2015 jyly 58,5-ke), al týberkýlezden bolatyn ólim-jitimdi 2 ese (100 myń halyqqa shaqqanda 2011 jylǵy 8,4-ten 2015 jyly 4,1-ge) tómendetýge múmkindik berdi.
Sonymen qatar, G.Ábdiqalyqova Qalalyq kardıologııa ortalyǵynda boldy.
