Ábdiqalyqova: Memlekettik rámizderdiń 25 jyldyǵyn merekeleýdiń basty maqsaty - qazaqstandyq patrıotızmdi nasıhattaý

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqovanyń tóraǵalyǵymen Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııa otyrysy ótti, dep habarlaıdy QazAqparat.

«Ózderińizge belgili, bıylǵy jyly memlekettik rámizderimiz Memlekettik Tý men Eltańbanyń qabyldanǵanyna 25 jyl tolady. Bul eldikti jáne egemendikti aıqyndaıtyn aıtýly data. Sondyqtan osy merekeler aıasynda oblystar, Astana, Almaty qalasy belgili bir is-sharalar, jumystar  júrgizýi qajet. Memlekettik rámizderdiń 25 jyldyǵyn merekeleýdiń basty maqsaty -Máńgilik el murattaryn, qazaqstandyq patrıotızmdi nasıhattaý, óskeleń urpaqty Táýelsizdikti qorǵaýǵa tárbıeleý  bolyp tabylady. Sonymen qatar komıssııa jumysyna vedomstvolyq nagrada boıynsha usynys bar», - dedi komıssııa otyrysyn ashqan Memlekettik hatshy.
 

Otyrys barysynda QR Mádenıet jáne sport mınıstrliginiń jaýapty hatshysy Qýat Ýálıevtiń QR memlekettik rámizderiniń 25 jyldyǵyn merekeleý boıynsha josparlanǵan is-sharalary týraly aqparaty tyńdalyp, QR Qorǵanys mınıstri Sáken Jasuzaqovtyń «El qorǵany» vedomstvolyq nagradasyn bekitý usynysy qaraldy.
   

Gúlshara Ábdiqalyqova otyrys qorytyndysynda memlekettik organdarǵa naqty tapsyrmalar men usynystar berdi.