Ábdiǵalı Qaımoldınge Abaı oblysynyń ákimi Altyn juldyz ben «Otan» ordenin tabystady

SEMEI. QazAqparat - Abaı oblysynyń ákimi Nurlan Uranhaev soǵys ardageri Ábdiǵalı Qaımoldınge Prezıdenttiń atynan «Halyq qaharmany» ataǵy men aıryqsha erekshelik belgisi – Altyn juldyz ben «Otan» ordenin saltanatty túrde tabys etti, dep habarlaıdy QazAqparat óńir basshysynyń baspasóz qyzmetine silteme jasap.

Memleket basshysy Qasym-Jomart Toqaev Ekinshi dúnıejúzilik soǵys kezinde kórsetken erligi, batyldyǵy, janqııarlyǵy, sondaı-aq soǵystan keıin memlekettik jáne qoǵamdyq qyzmetke belsendi qatysqany úshin Ábdiǵalı Qaımoldınge «Halyq qaharmany» ataǵyn berip, aıryqsha erekshelik belgisi – Altyn juldyz ben «Otan» ordenimen marapattaǵanyn jazǵan edik.

«Siz jáne sizdiń zamandastaryńyz elge adal qyzmet etýdiń jarqyn úlgisi bolyp otyrsyzdar. Ózińizdiń ómir jolyńyz óskeleń urpaqqa jáne jastarǵa baǵyt-baǵdar beredi. Biz sizdi maqtan etemiz jáne sizge qarap boı túzeımiz», - dedi oblys ákimi.

Abaı oblysy ákimdiginiń málimetinshe, Halyq qaharmanyna áskerı orkestr qurmet kórsetip, «Jeńis kúni» ánine súıemeldeý jasady.

Saltanatty marapataýdan keıin Abdyǵalı Qaımoldın óz batasyn berip, el ıgiligi jolynda adal qyzmette sáttilik tiledi.

QAIMOLDIN ÁBDІǴALI –soǵys jáne eńbek ardageri

1921 jyly 30 maýsymda Semeı oblysy Abyraly aýdany Uzynbulaq aýylynda dúnıege kelgen.

1941 jyly ásker qataryna shaqyryldy. 1941-1945 jyldyń 9 mamyry aralyǵynda Stalıngrad, 1-Ýkraına, 1-Belarýs, 3-Baltyq maıdandarynda shaıqasty. 1946 jyldyń maýsym aıynda ásker qatarynan bosatylǵan.

Ardager Ábdiǵalı Qaımoldın KOKP Semeı oblystyq komıtetinde, Jańasemeı, Novopokrovsk aýdandarynyń atqarý komıtetinde eńbek etti. 1977-1982 jyldary «Túrksib» sovhozy partııa komıtetiniń hatshysy bolyp jumys istedi jáne osy jerden qurmetti demalysqa shyqty.