Ábdel Fattah As-Sısı: Qazaqstannyń da, Mysyrdyń da basty múddesi - álemde beıbitshilik ornatý
ASTANA. QazAqparat - Qazaqstannyń da, Mysyrdyń da basty múddesi - álemde beıbitshilik ornatý. Bul týraly búgin Aqordada Elbasy Nursultan Nazarbaevpen kelissózderden keıingi birlesken málimdemede Mysyr Arab Respýblıkasynyń Prezıdenti Ábdel Fattah As-Sısı aıtty.
«Qazaqstan men Mysyrdyń arasynda erekshe qarym-qatynastar damyǵan. Sondyqtan bizdiń oıymyzsha, bul baılanystardyń da bolashaǵy óte zor. Ásirese, saýda, ekonomıka salalaryn shıryqtyra túsýge múmkindigimiz mol. Eki eldiń arasyndaǵy saıası baılanystar da erekshe. Demek, bizder ortaq múddelerimizdi júzege asyra alamyz»,- dedi Mysyr Prezıdenti.
Ábdel Fattah As-Sısı eki eldiń arasyndaǵy yntymaqtastyq lańkestikpen kúreste erekshe oryn alatyndyǵyn basa aıtty.
«Qazaqstan Prezıdentimen kelisózderimiz bizderdiń aımaqtyq jáne óńirlik máselelerdegi ustanymdarymyzdyń ortaq ekendigin kórsetip berdi. Eki eldiń de basty múddesi - álemde beıbitshilik ornatý», - dedi Mysyr Prezıdenti.
