Abbas Palestınada 20 jylda alǵash ret parlament saılaýy ótetinin rastady
ASTANA. KAZINFORM — Saılaýǵa daıyndyq FATH qozǵalysyndaǵy pikir qaıshylyǵy, Gaza sektorynyń saılaýǵa qatysý-qatyspaýynyń áli naqtylanbaýy jáne belgilengen merzimniń saqtalýyna qatysty alańdaýshylyq jaǵdaıynda ótip jatyr, dep habarlaıdy Kazinform agenttiginiń menshikti tilshisi.
Palestına prezıdenti Mahmud Abbas 2026 jylǵy 28 qarashada Palestına zań shyǵarý keńesine saılaý ótkizýdi josparlap otyrǵanyn rastady. Bul Palestına aýmaǵynda sońǵy 20 jylda ótetin alǵashqy parlament saılaýy bolmaq. Ol bul týraly BUU Bas Assambleıasyna qatysýshylarǵa arnaǵan beıneúndeýinde málimdedi.
— Biz bıyl 28 qarashada zań shyǵarý keńesine saılaý ótkizý úshin daıyndyqty jalǵastyryp jatyrmyz, — dedi Abbas.
Palestına basshysy bıliktiń halyq pen halyqaralyq qaýymdastyq aldynda qabyldaǵan reformalar baǵdarlamasy tolyq oryndalǵanyn da aıtty. Buǵan deıin AQSh Palestına ulttyq ákimshiliginen sybaılas jemqorlyqpen kúresip, memlekettik basqarý júıesin jetildirý úshin sharalar qabyldaýdy talap etken edi.
Palestına zań shyǵarý keńesiniń sońǵy saılaýy 2006 jyly, al prezıdent saılaýy 2005 jyly ótti. Parlament saılaýynda HAMAS basymdyqqa ıe boldy. Odan keıin HAMAS pen FATH arasyndaǵy teketires kúsheıip, qozǵalys Gaza sektoryna baqylaý ornatty.
2026 jyly Abbas 2027 jyly prezıdent saılaýyn ótkizý týraly jarlyq shyǵardy. Alaıda daýys berýdiń naqty kúni ázirge belgilengen joq.
Palestına basshysynyń málimdemesine qaramastan, FATH ókilderi saılaýdyń belgilengen merzimde ótetinine kúmán keltiredi. Qozǵalystyń bir bóligi aldymen barlyq palestınalyq fraktsııamen dıalog ornatýdy usynsa, endi biri Izraıldiń Gaza sektoryna saılaý jáshikterin, bıýlletender men qajetti qujattar jáne sııa jetkizýge ruqsat bermeı otyrǵanyn alǵa tartady.
FATH qozǵalysy da ázirge óz kandıdattarynyń tizimin jarııalaǵan joq. Palestına Ortalyq saılaý komıssııasy saılaýǵa qatysýǵa ótinishterdi 26 qyrkúıekten bastap qabyldaýdy josparlap otyr.
HAMAS saılaýǵa qatysatynyn málimdep, FATH-qa qarsy koalıtsııa qurý úshin basqa saıası kúshtermen kelissiz júrgize bastady. Atalǵan taraptardyń qatarynda FATH-tyń burynǵy joǵary laýazymdy ókili, qazir BAÁ-de turatyn jáne Abbastyń muragerleriniń biri sanalatyn Muhammed Dahlan da bar.
Frantsııa Palestına bıligin parlament jáne prezıdent saılaýyn ótkizýge shaqyrdy. Parıj Palestına ulttyq ákimshiligine saılaýǵa daıyndyq barysynda qoldaý kórsetip, Eýropa odaǵy baıqaýshylaryn jiberýdi qoldaıdy.
AQSh Abbasqa jáne Palestına delegatsııasynyń ózge de múshelerine elge kirýge vıza bermegennen keıin, ol BUU Bas Assambleıasynyń otyrysynda Ramalladan beınebaılanys arqyly sóz sóıledi.
Vashıngton bul shekteýdi Palestına bıliginiń Izraılmen aradaǵy qaqtyǵysty halyqaralyq deńgeıge shyǵarýǵa baǵyttalǵan áreketterimen túsindirdi.
Palestına prezıdenti AQSh-tyń bul sharalaryn zańsyz dep atap, Vashıngtondy dıalogty qaıta bastaýǵa jáne eki memleket qaǵıdatyn júzege asyrýǵa baǵyttalǵan halyqaralyq kúsh-jigerdi qoldaýǵa shaqyrdy. Onyń aıtýynsha, qazirgi ýaqytta Palestınany 160 memleket moıyndaǵan.
Buǵan deıin Palestınanyń FATH qozǵalysy 10 jylda alǵash ret jańa basshylyǵyn saılap jatqanyn habarlaǵan edik.
