Abaıtanýshy ǵalym M. Myrzahmetulynyń aýdıokitaby jaryq kórdi
ALMATY. Qazannyń 26-sy. QazAqparat /Erbol Turymbetov/ - Búgin Almatydaǵy Abaı atyndaǵy Qazaq ulttyq pedagogıkalyq ýnıversıtetinde kórnekti abaıtanýshy ǵalym, fılologııa ǵylymdarynyń doktory, professor Mekemtas Myrzahmetulynyń 80 jyldyǵyna arnalǵan «80 jasqa 80 kitappen» atty kitap kórmesi bolyp ótti.
Onda ǵalymnyń 1982 jyly shyqqan «Muhtar Áýezov jáne abaıtaný máseleleri» atty kitabynan bastap, búginge deıingi barlyq eńbekteri qoıylǵan. Ýnıversıtettegi «Abaıtaný» ǵylymı-zertteý ortalyǵynyń atqarýshy dırektory Jabal Shoıynbettiń aıtýynsha, M. Myrzahmetulynyń 80 kitabynyń teń jartysy Abaıdy tanýǵa arnalǵan. «Qazaq ádebıetinde 3 adam naǵyz abaıtanýshy bolyp sanalady. Olar M. Áýezov, Q. Muhamedjanov jáne M. Myrzahmetuly», - deıdi ol.
Sonymen birge, kórmede ǵalymnyń ózi basqaratyn «Abaıtaný» ǵylymı-zertteý ortalyǵy daıyndaýymen Tokıo qalasynda zamanaýı úzdik tehnologııamen basylyp shyqqan «Abaıtaný álippesi» aýdıo oqý quralynyń tusaýkeseri ótti. Onyń avtorlary M. Myrzahmetuly, N. Kerimbaev jáne Sh. Ábýova. «Jaqsy bala» (5-8 jáne 9-shy synyptar úshin), «Jaqsy qurdas», «Jaqsy ustaz», «Jaqsy ata-ana» kitaptary 750 dana bolyp basylyp shyqty. Bul kitaptardyń ereksheligi - arnaıy jasalǵan elektrondy qalam arqyly oqylady. Qalammen Abaıdyń kez kelgen óleńin túrtip qalǵan jaǵdaıda óleń avtomatty túrde oqylady.
Oǵan qosa, aýdıokitapta arnaıy oıyndar da uıymdastyrylǵan. Avtordyń aıtýynsha, bala sol oıyndy oınap otyryp, Abaı álemine qalaı kirip ketkenin de baıqamaı qalady. «Ázirge bul kitaptardyń 750 danasy basylyp shyqty. Alda 6 myń danasyn shyǵarýdy kózdep otyrmyz», - deıdi M. Myrzahmetuly.
