Abaılyq 13 jastaǵy oqýshy qamshynyń 15 túrin óredi

ASTANA. KAZINFORM - Abaı oblysy Aıagóz aýdanyndaǵy №5 mekteptiń 7-synyp oqýshysy gadjetter men áleýmettik jelilerdi emes, ata-baba ónerin serik etken.

Ulttyq qolónerge qyzyǵýshylyǵmen, beıimdigimen erekshelenetin Álıhan Salıhan qamshy órýdiń 15 túrin meńgergen.

Oqý-aǵartý mınıstrligi málimetinshe, ol qamshy órýdiń kúrdeli tehnıkasyn óz betimen úırenip, búginde doıyr, tobylǵy sapty, órme, segiz órim, shynjyr baýly, sándik, alaqandy sekildi birneshe túrin óredi.

– Qamshy – jaı ǵana buıym emes, bul tarıh jáne rýh. Ár órimdi jasaǵan saıyn ata-babalarymyzdyń ómir saltyn, batyrlyq bolmysyn kóz aldyma elestetemin. Maqsatym – qamshy órý ónerin meńgerip qana qoımaı, zamandastaryma úlgi bolyp, ulttyq muraǵa qurmetpen, qyzyǵýshylyqty arttyrý, – deıdi jas sheber.

Álıhan qamshy órý isine bala kezinen qyzyǵyp, óz ákesinen úırengen. Ol qamshynyń shyǵý tarıhyna da qyzyǵýshylyq tanytyp, zertteý júrgizip júr.

Aıta keteıik, Pavlodarda qamshy órý óneri jańǵyrdy.