«Abaılańyz, balalar!» is-sharasynyń alǵashqy 2 kúninde jol qozǵalysy erejesiniń 10 myńnan astam buzýshylyǵy anyqtaldy
ASTANA. Qyrkúıektiń 3-i. QazAqparat - «Abaılańyz, balalar!» respýblıkalyq jedel aldyn alý is-sharasynyń alǵashqy 2 kúninde jol qozǵalysy erejesiniń 10 myńnan astam ret buzylǵandyǵy anyqtaldy.
Bul aqparatty QR ІІM Jol polıtsııasy komıtetiniń baspasóz qyzmeti taratyp otyr.
«Operatsııanyń alǵashqy eki kúninde jol qozǵalysy erejesiniń 10 myńnan astam buzylǵandyǵy anyqtaldy. Jol qıylysy erejesin buzǵany úshin myńnan astam júrgizýshi ákimshilik jaýapkershilikke tartyldy. Sondaı-aq jaıaý júrginshiler jolyn jáne marshrýttyq kólik quraldarynyń aıaldaý erejelerin buzýdyń myńǵa jýyq faktisi tirkeldi», delingen baspasóz aqparatynda.
Esterińizge sala keteıik, tamyzdyń 31-inde respýblıkada «Abaılańyz, balalar!» jedel aldyn alý is-sharasy bastalǵan bolatyn. Balalardyń jol-kólik jaraqatynyń aldyn alý jáne júrgizýshilerdiń nazaryn kámilettik jasqa tolmaǵan jol qozǵalysyna qatysýshylarǵa aýdartý maqsatynda ótkizilip jatqan shara qyrkúıektiń 9-yna deıin jalǵasady.
Aktsııa aıasynda jol polıtsııasynyń qyzmetkerleri mektepterde, balabaqshalarda jol qaýipsizdigine oraı sabaq ótkizedi. Qaýipsizdik sharalaryn saqtaý boıynsha kólik quraldarynyń júrgizýshilerimen de áńgimelesý ótkiziledi. Sonymen qatar jol qozǵalysy erejeleri boıynsha mektep oqýshylary arasynda konkýrstar men saýalnamalar ótkizý josparlanǵan. Budan basqa balalardyń jol-kólik jaraqatynyń aldyn alýǵa baǵyttalǵan basqa da is-sharalar qarastyrylyp otyr.
