Abaıdyń urpaǵy Manataı aqsaqal: Bul saılaýdan úlken úmit, jaqsylyq kútemiz

ÓSKEMEN. QazAqparat – Uly Abaıdyń urpaǵy Manataı Baltaqaıuly Parlament Májilisi jáne barlyq deńgeıdegi máslıhattar depýtattarynyń saılaýyna qatysyp, óz tańdaýyn jasady, dep habarlaıdy QazAqparat tilshisi.

Seksenniń seńgirine shyqqan Manataı aqsaqal Abaı aýdanynyń Qaraýyl aýylynda dúnıege kelgen. 1959 jyly Semeı mal dárigerlik ınstıtýtyn támamdaǵan. Kóp jyldar boıy ol veterınarııa salasynda eńbek etti. 90-shy jyldary Abaı aýdany ákiminiń orynbasary, aýdandyq aýyl sharýashylyǵy kásipodaq uıymynyń tóraǵasy boldy. 2000 jyldan beri zeınette.

«Búgin halqymyz úshin aıtýly kún. Bul saılaýdan úlken úmit, jaqsylyq kútemiz. Saılaý demokratııa talaptaryna saı ótip jatyr dep esepteımin. Densaýlyq jaǵdaıyma baılanysty saılaý ýchaskesine baryp daýys bere almadym. Sondyqtan úıden daýys berýge ótinish jasaǵan edim. Sóıtip ýchaske músheleri úıge kelgen soń óz daýysymdy berdim. Elbasymyzdyń jáne Prezıdent Qasym-Jomart Toqaevtyń bastamasymen memleket tarapynan kóptegen aýqymdy sharalar atqarylýda. Birligimiz nyǵaıyp, halyqtyń jaǵdaıy jaqsara bersin! Saılanatyn depýtattar jurt múddesin qorǵaý jolynda aıanbaı jumys isteıtinine senemin», – dedi aqsaqal.

Aıta keteıik, Manataı Baltaqaıuly qazaqtyń tuńǵysh kásibı skrıpkashysy Aıtkesh Tolǵanbaevtyń «Qatal taǵdyr tálkegi» atty ómirbaıandyq kitabyn orys tilinen qazaq tiline aýdarǵan. Oblystyq jáne aýdandyq gazetterde týǵan ólkeniń tarıhy men tuǵyry bıik tulǵalary týraly talaı maqalalar jarııalady. Eki ul, úsh qyz tárbıelep, olardan alty nemere súıip otyr.