Abaıdyń urpaǵy - halyqaralyq olımpıada jeńimpazy
ASTANA. QazAqparat - Almatylyq 15 jastaǵy oqýshy Dana Aqylbaeva orys tili páni boıynsha Máskeýde ótken halyqaralyq olımpıadanyń jeńimpazy atanyp, Reseı Federatsııasynyń ózi qalaǵan joǵarǵy oqý ornynda tegin bilim alatyn boldy, dep jazady 24.kz.
29 elden kelgen 200-den astam oqýshynyń arasynda absolıýtti jeńimpaz atanǵan Dana - Uly Abaıdyń jetinshi urpaǵy. XIII halyqaralyq olımpıadanyń absolıýtti jeńimpazy atanyp kelgen Dana alǵashqy qýanyshyn ustazy Nına Aldonovamen bólisti. Orys tili men ádebıetiniń qyr-syryn úıretip qana qoımaı, jetistikke jetýime sebepker bolǵan da ustazym deıdi 15 jasar oqýshy.
«Joq, bul - birlesken eńbek. Sebebi oqýshyda qandaı da bir negiz bolmasa, ony jeteleý qıynǵa soǵar edi. Al Dana - óte sezimtal ári logıkalyq oıy júıeli shákirt. Onyń ádebıetke jaqyndyǵy janynyń sulýlyǵyn tanytady. Bul baıqaý onyń juldyzdy sáti boldy», - deıdi Panfılov atyndaǵy Qazaqstan-Reseı mektep-gımnazııasynyń muǵalimi Nına Aldonova.
Bes jylda bir ótetin halyqaralyq olımpıadaǵa álemniń 29 elinen 205 oqýshy qatysypty. 30-shy memleket Ýkraına bolatyn. Alaıda eldegi saıası teketiresterge baılanysty óz zamandastarynyń shekaradan óte almaýyn Dana olımpıada tapsyrmasy boıynsha «Dostyq» taqyrybynda berilgen mazmundamasynyń sońynda nazdana jazǵan eken. Reseı Federatsııasynyń Bilim jáne ǵylym mınıstrligi uıymdastyrǵan baıqaýdyń ekinshi suraǵy «Memleket jáne óner» jaıynda bolǵan. Kórkemsýret mektebin támámdaǵan Dana Aqylbekova úshin bul da qıynǵa soqpaǵan. Ónerge, tilge, jany sulýlyqqa ári beıbitshilikke qumar qyz keıin bilgenimizdeı, Uly Abaıdyń Aqylbekten taraǵan urpaǵy bolyp shyqty.
«Iá, jetistikke jetýime Abaı atamnyń rýhy dem bergen shyǵar. Degenmen, men Uly Abaıdyń urpaǵymyn dep aıqaılap aıta berýdi jón kórmeımin. Ol úshin áli kóp eńbek etip, talaı asýlarǵa jetýim kerek. Al bul joly ras, men kóp oqydym, kóp izdendim. Halyqaralyq olımpıadanyń absolıýtti jeńimpazy dep meniń atymdy ataǵanda qýanyshymda shek bolmady», - deıdi Dana Aqylbekova.
«ıA» - ıazyk, ıaǵnı, «til» degen maǵynany bildiretin eskertkish Danaǵa Reseı federatsııasynyń qalaǵan joǵarǵy oqý ornynda tegin bilim alýyna múmkindik berip otyr. 9-synypty bitirip, 10-synypqa aıaq basqan ol keler jyldy ekstern bitirip, arǵy jyly Máskeýdiń halyqaralyq qatynastar ınstıtýtyna túsýdi maqsat etip otyr.
