Abaıdyń týǵan kúninde 16 zertteý eńbegi jaryq kórdi – EUÝ rektory

NUR-SULTAN. QazAqparat – 10 tamyz kúni Abaı týraly 16 zertteý eńbegi jaryq kórdi. Jyl sońyna deıin taǵy 20-dan astam kitap shyǵarý josparda bar. Bul týraly L.N.Gýmılev atyndaǵy Eýrazııa Ulttyq ýnıversıtetiniń rektory, tarıh ǵylymdarynyń doktory Erlan Sydyqov Abaıǵa arnalǵan kitaptyń tusaýkeserinde aıtty, dep habarlaıdy QazAqparat tilshisi.

«Abaıǵa arnalǵan kitap qansha shyqsa da azdyq etpeıdi. Abaıdy zertteý, nasıhattaý endi bastaldy. Oǵan muryndyq bolyp otyrǵan Abaıdyń ózi jáne onyń qajettiligin halyqqa jetkizip otyrǵan QR Prezıdenti Qasym-Jomart Toqaev. Ol Abaıdyń toıy biz úshin ǵylymnyń, rýhtyń, mádenıettiń toıy bolýy kerek ekenin aıtty», - deıdi L.N.Gýmılev atyndaǵy Eýrazııa Ulttyq ýnıversıtetiniń rektory, tarıh ǵylymdarynyń doktory Erlan Sydyqov.

Onyń sózine qaraǵanda, aldaǵy mindet – Abaıdy álemge tanytý.

«Abaıdy álemge tanytý kerek, sebebi ol qazaq halqynyń ǵana emes, adamzattyń Abaıy. Ol uly gýmanıst. Abaıdy ártúrli tilge aýdarý arqyly nasıhattaý – basty baǵyttardyń biri bolýy kerek. Prezıdent Abaıdyń 175 jyldyǵyn atap ótý aıasynda EUÝ-da «Abaı akademııasy» ǵylymı-zertteý ınstıtýtyn qurýdy tapsyrǵan bolatyn. 6 aıdyń ishinde óz qarajatymyzben arnaıy jobany iske asyrdyq. 100-den astam zertteýshi jumys isteýde. 16 zertteý eńbegimiz 10 tamyz kúni jaryq kórdi. Jyl sońyna deıin taǵy 20-dan astam kitap shyǵarý josparda bar», - deıdi ol.

Eske sala ketsek, búgin Facebook-tegi Qazaqstan halqy Assambleıasynyń paraqshasynda Abaı týraly «Álemdi aıalaǵan sóz» atty kitaptyń tusaýkeseri boldy.