Abaıdyń qoryq-mýzeıi aqynnyń mereıtoıyna bólingen aqsha qaıda jumsalatynyn aıtty

NUR-SULTAN. QazAqparat - Abaıdyń «Jıdebaı-Bórili» Memlekettik qoryq-mýzeıiniń dırektory Jandos Áýbákir uly aqynnyń 175 jyldyq mereıtoıyna bólinetin qomaqty qarajattyń qaıda jumsalatynyn aıtty, dep habarlaıdy QazAqparat.

«Abaıdyń 175 jyldyq mereıtoıyna arnalǵan sharalarǵa qomaqty qarjy bólinip otyr. Bul osy jyly eldigimiz ben rýhanııatymyz úshin asa mańyzdy shara ári memlekettik qana emes, halyqaralyq deńgeıde atqarylatyn zor mindet. Bıyl osy mereıtoı aıasynda josparlanyp otyrǵan qarajat iri halyqaralyq jáne respýblıkalyq qoǵamdyq mańyzy bar ǵylymı, aǵartýshylyq is-sharalarǵa, Abaı murasyn nasıhattaýǵa baǵyttalǵan kórmelerge, jalpy aqyn ómirinen syr shertetin qundy jádigerlerdi saqtap otyrǵan mýzeı salasyna jumsalatyn bolady», - dedi ol.

Mýzeı dırektorynyń aıtýynsha, mereıtoı aıasynda Abaıdyń qasterli mekeni – áıgili Jıdebaıdy abattandyrý, uly aqynnyń rýhyna taǵzym etýge keletin jurtshylyqqa qolaıly jaǵdaı jasaý kózdelgen.

«Sonymen qatar Prezıdent Qasym-Jomart Toqaev «Abaı jáne HHІ ǵasyrdaǵy Qazaqstan» maqalasynda atap ótkendeı, Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıin ǵylymı-tanymdyq jumystarmen aınalysatyn ortalyqqa aınaldyrý josparlanyp otyr. Bir sózben aıtqanda bul toı Uly aqyn Abaıdyń rýhyna taǵzym etip, murasyn dáriptep, barsha álem jurtshylyǵyna Abaıdy tanytý, qazaq eliniń mádenıeti men rýhanııatyn pash etý úshin ótkizilmek», - dedi Jandos Áýbákir.

Foto: abay-museum.kz