Abaıdyń qara sózi qytaılyqtardyń naqylyna aınaldy - Nursultan Nazarbaev
«Kezdesý barysynda Sı Tszınpınniń «Birinshi tolqyn aǵalar, ekinshi tolqyn iniler, birge júrip óliner, baıaǵydaı kóriner» degen Abaıdyń 37-shi qara sózin qytaısha aıtyp otyrǵany biz úshin, árıne, janymyzǵa jaǵady. Bul Abaı babamyzdyń halyqaralyq qatynasqa da óz áserin tıgizgenin bildiredi. Abaıdy bilgennen keıin bizdiń halqymyzdy bilý degen sóz. Men de bul kisilermen sóılesken kezde Konfýtsııdiń sózderin mysalǵa keltirip otyramyn. Qazir biz turǵan jer Konfýtsııdiń aýyly, osydan 100 shaqyrym jerde týǵan deıdi. Dıplomatııalyq jaǵdaılarda bir-birimizge jaqsy sóz aıtý úshin ondaı bolyp turady. Osy saparymda da «Kompozıtor» degen kınofılm túsirip alyp keldik. Fılmniń arnaıy kórsetilimine kınoda oınaǵan ártister men rejısserler keldi. Bundaı sharalar eki eldiń arasyn jaqyndatady», - dedi Nursultan Nazarbaev
Elbasy Qazaqstan arqyly ótetin «Jibek joly» Qytaı men Eýropany jalǵap, sol arqyly Qytaımen qarym-qatynasymyz ǵasyrlar boıy bolǵanyn aıtty.
«Qazir de 14 myń qazaqstandyq jas Qytaıda bilim alyp jatyr. Elshiliktiń málimeti boıynsha odanda kóp bolýy múmkin. Men keshe bir top jastarmen kezdestim. Qytaı tilin oqýǵa olardyń yntasy zor. Bolashaqta Qazaqstanda jumys jasaıtyn Qytaı kompanııalarynda qyzmet etýi úshin ózimizdiń mamandar, tilmashtar qajet. Olarda eki el arasyndaǵy yntymaqtastyqty arttyratyn bolady. Sonymen qatar Sı Tszınpın Abaıdyń osy sózi qytaı halqynyń arasyna keńinen tarap, naqylǵa aınaldy dep aıtty», - dedi Nursultan Nazarbaev.
