Abaıdyń qara sózderiniń orys tilindegi aýdıo-nusqasy bilim salasynda ǵalamtordan eń kóp kóshiriletin saıttardyń biri bolyp otyr
ALMATY. 11 qańtar. QazAqparat - Bizdiń maqsatymyz Abaı shyǵarmalaryn jastar arasynda nasıhattaý. Bul týraly «Abai 45» jobasy avtorlarynyń biri Aısulý Ázimbaeva búgin Almatydaǵy Ábilhan Qasteev atyndaǵy memleketik óner mýzeıinde ótken jobanyń tanystyrý rásimnde aıtty.
«Abai 45» jobasy - kommertsııalyq emes bastama. Avtory «Lých» táýelsiz shyǵarmashylyq birlestigi. Onyń basynda Indıra Súleımenova, Shyńǵys Kapın sııaqty ultjandy jas zamandastarym bar. Jobanyń negizinde zamanaýı jastardyń nazaryn qazaq ádebıetiniń irgeli týyndylaryna aýdarý jáne óz eliniń mádenı murasyna qyzyǵýshylyqtaryn oıatyp, nasıhattaý máselesi jatyr. Bizdiń shyǵarmashylyq birlestik óz dostary men «Mobile cretors» ázirleýshiler komandasynyń qoldaýymen - www.abai45.kz saıty men tegin mobıldik usynymyn jasady. Qazirdiń ózinde ol bilim salasynda ǵalamtordan eń kóp kóshiriletin 3 saıttyń biri bolyp otyr», - deıdi A.Ázimbaeva. I. Súleımenovanyń aıtýynsha, onda Abaıdyń 45 qara sóziniń orys tilindegi aýdıo-nusqasy bar. Onda Rollan Seısenbaev pen Klara Serikbaevanyń túpnusqa aýdarmasy qoldanyldy. Olar Ásel Saǵatova, Ánýar Nurpeıisov, Asylhan Tólepov, Qarlyǵash Muhamedjanova, Sanjar Madıev, Nurtas Adambaev sııaqty jas akterlerdiń qatysýymen dybystalyp otyr. Jobada sondaı-aq, akterlerdiń arnaıy fotosessııasy jasalyp, árbir aýdıo-trek Qýat Shildebaevtyń avtorlyq kompozıtsııasymen árlengen.
