Abaıdyń qara sózderin ejiktep oqyǵan E.Serǵazın komıssııa kóńilinen shyqpady - M.Joldasbekov
Onyń úsh kezeńde tapsyrǵan emtıhanyndaǵy kemshilikterdi komıssııa tóraǵasy Myrzataı Joldasbekov jarııa etti.
«Erjan Merekeuly Serǵazın myrzanyń búgin qazaq tilinen tapsyrǵan emtıhanynyń nátıjesi mynadaı boldy. Birinshi jazba jumysynyń taqyryby: «Konstıtýtsııa - turaqty damý kepili». Erjan myrza eki bet jumys jazypty. Jumystyń bas jaǵynda ájeptáýir jaqsy tarıhı derekter bar. Biraq qazirgi bizdiń Konstıtýtsııamyzdyń turaqty damý kepildigi jaıy ashylmaı qalǵan. Onyń ústine, jumysynda 24 qate ketipti. Emlesi - 6, tynys belgisi - 13, stıldik qate - 5. Jalpy, bizdiń talabymyzda prezıdenttikke úmitker azamattar saýatty jazýy kerek, saýatty sóıleýi kerek», - dedi M.Joldasbekov.
Úmitker ekinshi kezeńde Abaıdyń poezııasy men qara sózderinen 3 bettik mátin oqyǵan.
«Shynyn aıtý kerek, Erjan myrza ejiktep oqydy. Keıbir mátinniń maǵynasyn tolyq túsinbedi. Sol mátin ishinde kezdesetin qazaqtyń baıyrǵy sózderin, máselen, qareket, kókirek tazalaý syndy sózderdi túsindirip aıta almady», - dedi M.Joldasbekov.
Komıssııa tóraǵasynyń aıtýynsha, úshinshi kezeńde «Qazaq óneriniń bel-belesteri» degen taqyrypta 15 mınýt sóılegen E.Serǵazınnyń oıy shashyrańqy bolǵan.
«Jalpy, sóılem quraýy ózge bir sheteldik azamattyń qazaq tilin jańa-jańa úırenip júrgenindeı estildi. Logıka, júıe joq. Osynyń bárin eskere kelip, komıssııa Erjan Merekeuly qazaq tilin erkin meńgermegen degen qorytyndy shyǵaryp otyr», - dedi ol.
