Abaıdyń qara sózderi týraly teleepopeıa jeltoqsan aıynyń sońynda kórsetiledi
ASTANA. QazAqparat - Uly oıshyl Abaı Qunanbaıulynyń mol murasynyń biri - «Qara sózderi». Qashan da ómirsheń mura keshegi kúnniń de, búginginiń de, tipti bolashaqtyń da tamyryn dóp basady.
Túrli otbasynyń HІH ǵasyrdyń, HH ǵasyrdyń 40 jáne 90-ynshy jyldaryndaǵy úsh urpaǵynyń ómiri týraly «Aqyldyń kilti» telehıkaıasy Abaıdyń «Qara sózderiniń» mazmunyn qamtıdy. Onyń tusaýkeseri 10 jeltoqsan kúni Qazmedıa ortalyǵynyń kınokontsert zalynda ótti.
Qazaqtyń uly aqyny, fılosof, aǵartýshy Abaıdyń 170 jyldyǵyna oraı túsirilgen 12 serııadan turatyn «Aqyldyń kilti. Ómir dastany» týyndysy arqyly oıshyldyń «Qara sózderinen» jas urpaqqa ulaǵat aıtý kózdelgen.
Kartınaǵa teatr jáne kıno akterleri Dýlyǵa Aqmolda, Danııar Bazarqulov, Baýyrjan Qaptaǵaev, Darhan Súleımenov jáne basqalar qatysty. Biregeı teletýyndy «Habar» telearnasynyń efırinen jeltoqsannyń sońynda kórsetiletin bolady, dep habarlanǵan telearna saıtynda.
