«Abaıdyń qara sózderi» kúmispen kúpteldi

ASTANA. 28 aqpan. QazAqparat - Qazaqstannyń tarıhynda tuńǵysh ret hákim Abaıdyń qara sózderi eksklıýzıvti basylym bolyp shyqty. Shekteýli danamen jaryq kórgen kitaptyń muqabasy terimen túptelip, kúmispen kúptelgen. Al basylym betteri eskirmeıtin arnaıy qaǵazdan jasalyp otyr. Keshe, aqpannyń 27-si kúni Astanadaǵy Qazirgi zaman óner murajaıynda atalǵan kitaptyń tanystyrylymy boldy.

Osy jumyspen aınalysqan «A» baspa úıiniń dırektory Dına Ábdákimovanyń habarlaýynsha, «Abaı» kitabynyń eksklıýzıvti nusqasy Polshada basyldy. «Onyń birneshe sebebi bar. Birinshiden, bul kitaptyń árbir beti jibek jippen tigilip, dóńes qalypta túptelgen. Ondaı tehnologııany Qazaqstan da, kórshi Reseıde de jasaı almaıdy. Ekinshiden, «Nobel paper» úlgisindegi eskirmeıtin qaǵaz bizde joq. Ony tek Eýropada ǵana kezek-kezekpen alady. Bundaı qaǵaz ýaqyt synyna shydap, esh sarǵaımaıdy. Kitaptyń muqabasyn basqan kezde, biz qazaq qolóneriniń aıshyqty naqyshtary - túıetaban, qoshqarmúıiz sııaqty oıý-órnekterdi jan-jaqty zerttep, arnaıy bastyrmalardy shyǵarý arqyly bylǵaryǵa bastyq. Bárińiz bilesiz, erte zamannan beri qazaq halqy úshin kúmistiń orny bólek bolǵan ǵoı. Sondyqtan biz kitaptyń syrty men ishin kúmispen kúptep kómkerdik. Qazaqstan Táýelsizdiginiń 20 jyldyq tarıhynda bundaı basylym alǵash ret jaryqqa shyǵyp otyr», - deıdi D. Ábdákimova.