Abaıdyń esimimen atalǵan qansha kóshe, mektep bar

ASTANA. QazAqparat – Mádenıet jáne sport mınıstri Ashat Oralov Abaı kúnine oraı birqatar statıstıkalyq málimetpen bólisti, dep habarlaıdy QazAqparat.

«Abaı – keıingi tolqyn aqyndar men jazýshylardy, sýretshiler men ǵalymdardy shyǵarmashylyqqa shabyttandyrǵan ultymyzdyń birtýar tulǵasy. Esimi álemge máshhúr, uly oıshyldyń qundy eńbekteri ondaǵan shet tiline aýdarylǵan.
Abaı Qunanbaıulyna qoıylǵan eskertkishter Tashkent, Máskeý, Bishkek, Renn, Beıjiń, Kaır, Býdapesht, Tegeran, Ystanbul, Nıý-Delı, Jeneva, Parıj, Saraevo, Tbılısı, Berlın, Seýl, Harkov jáne Baký shaharynyń kórkin kirgizdi.

Al Qazaqstanda aqynnyń esimimen atalatyn 1441 kóshe, 12 dańǵyl, 99 mektep, 4 kolledj jáne 1 teatr bar», - dep jazdy mınıstr áleýmettik jelide.
Sondaı-aq A.Oralovtyń málimetinshe, Abaıdyń qurmetine 1 qala, 3 aýdan jáne 28 eldi meken atalǵan. Al ótken jyly Prezıdent Qasym-Jomart Toqaevtyń Jarlyǵymen Abaı oblysy quryldy, onyń ákimshilik ortalyǵy – Semeı qalasy. Memleket basshysynyń bastamasymen atalyp ótetin «Abaı kúni» elimizdiń ár óńirinde Abaıdyń ómiri men shyǵarmashylyǵyna arnalǵan mádenı jáne ǵylymı is-sharalar uıymdastyrylady.