«Abaıdyń alǵashqy kitaby» derekti fılmi kórsetiledi

NUR-SULTAN. QazAqparat - 26-27 jeltoqsan kúnderi 17:40-ta «Qazaqstan» Ulttyq telearnasy túsirgen «Abaıdyń alǵashqy kitaby» eki bólimdi derekti fılmi efırge shyǵady, dep habarlaıdy QazAqparat tilshisi.

Fılm Abaıdyń 1909 jyly Sankt Peterbýrgtegi Ilıas Boraganskıı baspasynda basylǵan alǵashqy shyǵarmalar jınaǵynyń jaryq kórý tarıhyna arnalady.

Abaı dúnıeden ótken soń, Turaǵul Abaıuly men Kákitaı Ysqaqulynyń uıymdastyrýymen el ishindegi Abaıdyń qaǵaz betine túsken shyǵarmalary jınaqtala bastaıdy. Abaıdyń shákirtteri Kókbaı, Ýáıis, Beısembaı aýzynan negizgi óleńderi jazylyp alynady. Jınaqtalǵan, júıelengen shyǵarmalardy Múrseıit Bikeuly men uly Turaǵul kóshirip, qaǵaz betine túsiredi. Bul ýaqytta Ahmet Baıtursynovtyń «Qazaq» gazetine Abaı týraly «Qazaqtyń bas aqyny» degen maqalasy jaryq kóredi. Derekti fılmde Abaı shyǵarmalaryn jınaqtap, baspaǵa berý isine Álıhan Bókeıhanovtyń atsalysqany týraly aıtylady. Sol ýaqyttaǵy musylman ádebıetterin shyǵaratyn Ilıas Boraganskıı Álıhan Bókeıhanovtyń ótinishimen kitapqa ataqty túrkolog Platon Melıoranskııdi jaýapty redaktor etip bekitkeni týraly derekter keltiriledi. Fılm osylaısha uly Abaı murasynyń qaǵaz betine tańbalaný tarıhyn jan-jaqty baıandaıdy.

Ulttyq arna derekti fılmniń túsirim jumystaryn Shyńǵystaý óńiri, Semeı, Omby, Qazan, Sankt-Peterbýrg qalalarynda júrgizdi. Jobada qundy mura tarıhy týraly «Jıdebaı-Bórili» qoryq-murajaıynyń dırektory Turdyǵul Shańbaıdyń, tarıhshy Sultan Han Aqqululy men abaıtanýshy ǵalym Tursyn Jurtbaıdyń pikirleri berilgen.

Derekti fılm «Qazaqstan» arnasynan 26-27 jeltoqsan kúnderi 17:40 ta efırge shyǵady.