10:28, 06 Aqpan 2020 | GMT +6
Abaıdyń 175 jyldyǵyna oraı túsiriletin telehıkaıaǵa kastıng jarııalandy
NUR-SULTAN. QazAqparat - «Qazaqstan» teleradıokorporatsııasy uly aqyn Abaıdyń 175 jyldyǵyna oraı túsiretin telehıkaıa akterlerine baıqaý jarııalaıdy, dep habarlaıdy QazAqparat telearnanyń Telegram paraqshasyna silteme jasap.
Kastıngke arnaıy akterlik qabileti bar, 17 men 40 jas aralyǵyndaǵy qolań shashty, qoıý qasty qyz-kelinshekter men 15 pen 50 jas aralyǵyndaǵy keskin-kelbeti kelisken, atqa mine alatyn er-azamattar qatysa alady.
«Buǵan deıin telehıkaıanyń stsenarııine baıqaý jarııalanyp, otandyq tájirıbeli óndirýshilerden úsh aı boıy ótinim qabyldanǵan bolatyn. Búginnen bastap teleradıokorporatsııanyń shyǵarmashylyq birlestigi men arnaıy qurylǵan Kórkemdik keńestiń qabyldaǵan nusqasy boıynsha túsirilim jumystaryna ázirlik bastaldy» delingen habarlamada.
Úmitkerler ózi týraly aqparatty (foto, vıdeo) 15 aqpanǵa deıin casting.abai@kaztrk.kz poshtasyna joldaı alady. Qosymsha aqparat: 8 747 706 64 94, 8 707 401 55 91.
