Abaıdyń 175 jyldyǵyn atap ótýge laıyqty daıyndyqpen kelý kerek - Murat Áýezov
«Komıssııanyń jınalýy der kezinde jasalyp otyr, alda uıymdastyrý sharalaryna ýaqyt bar. Osy oraıda jaqsy usynystar jınaqtap, kelesi Abaıdyń 175 jyldyǵyn tıisti deńgeıde ótkizýge múmkindik bolady. Qazaq halqy úshin Abaıdyń mańyzy óte joǵary. Eldiń tutastyǵy, birlikti nyǵaıtý, bolashaqqa úmitpen qaraý turǵysynda aǵartýshy óziniń erekshe maǵynalyq túsinigin bergen. Osynyń barlyǵyn uǵynyp, túsinip, 2020 jyldaǵy aýqymdy sharalarǵa laıyqty daıyndyqpen kelýimiz kerek. Óıtkeni Abaıdyń adamzat tarıhynda erekshe orny bar», - dedi ǵalym 2020 jyly Abaı Qunanbaıulynyń 175 jyldyq mereıtoıyn ótkizý jónindegi memlekettik komıssııanyń alǵashqy otyrysynyń aldynda.
Osy oraıda ol óskeleń urpaq uly aqynnyń kemeńgerligin uǵynyp, onyń shyǵarmalaryna qurmetpen qaraý kerektigin atap ótti.
Sonymen qatar M. Áýezov Uly Abaıdyń 175 jyldyǵyna oraı aqyn óleńderin oqý estafetasyna qatysty pikir bildirdi.
«Bul bastama maǵan óte unady. Shynymen de Abaı - halyqtan ult jasaıtyn tulǵa, qıyn kezeńde halqymyzdy biriktirýde úlken ról atqardy», - dedi Murat Áýezov.
Aıta keteıik, búgin QR Premer-Mınıstriniń orynbasary Gúlshara Ábdiqalyqovanyń tóraǵalyǵymen 2020 jyly qazaq halqynyń uly aqyny, aǵartýshysy Abaı Qunanbaıulynyń týǵanyna 175 jyldyq mereıtoıyn ótkizý jónindegi memlekettik komıssııanyń alǵashqy otyrysy ótti.
Jıyn barysynda halyqaralyq, respýblıkalyq jáne óńirlik deńgeıdegi 500-ge jýyq túrli shara qamtylǵan Abaı Qunanbaıulynyń 175 jyldyq mereıtoıyna daıyndalý men ótkizý jónindegi jalpyrespýblıkalyq jospardyń jobasy qaraldy.
Eske salsaq, QR Prezıdenti Qasym-Jomart Toqaev 9 jasar mektep oqýshysynyń estafetasyn qabyl alyp, ony Bilim jáne ǵylym mınıstri Ashat Aımaǵambetovke, Mádenıet jáne sport mınıstri Aqtoty Raıymqulovaǵa jáne búkil álemdi moıyndatqan talantty ánshi Dımash Qudaıbergenge joldaǵan edi.
