Abaıdyń 175 jyldyǵy: ShQO-da 71 ınfraqurylymdyq joba júzege asyryldy
Karantındik shekteýlerge baılanysty hakim mereıtoıyna oraı óńirde josparlanǵan 560 sharanyń 198-i júzege asyryldy. Onyń ishinde 71 ınfraqurylymdyq joba máresin jetken. Bul týraly oblys ákimi Danıal Ahmetov halyqqa esep berýinde aıtty.
Sársen Amanjolov atyndaǵy Shyǵys Qazaqstan ýnıversıteti janynda «Abaıtaný» ǵylymı-zertteý ınstıtýty quryldy. Oblys mektepteriniń 5-8 synyp oqýshylary men kolledj stýdentterine arnalǵan kabınetter ashylyp, elektıvti kýrstar engizildi. Sonymen qatar «Abaı álemi» kitaptar serııasy jaryq kórip, oblys teatrlarynda «Abaı», «Jas Abaı», «Qara sózder», «Abaı joly: «Sen óz oılaryńmen bizge uqsaısyń!» spektaklderi qoıyldy.
«Semeı qalasynda «Uly aqyn Abaı uldarymen» eskertkishiniń saltanatty ashylýy men Memleket basshysynyń abaıtanýshylarmen kezdesýi mereıtoıdyń negizgi oqıǵalary boldy. Barlyq sharalar Abaı Qunanbaıulynyń shyǵarmashylyǵyn nasıhattaýǵa, onyń ıdeıalaryn qazaqstandyqtardyń jańa býynyna patrıottyq tárbıe berýde paıdalanýǵa, tarıhı-mádenı mura eskertkishterin saqtaýǵa, Semeı qalasynyń týrıstik ınfraqurylymyn jáne Abaı aýdanynyń tarıhı jerlerin damytýǵa baǵyttaldy», - dedi aımaq basshysy.
Onyń aıtýynsha, ǵylymı-zertteý jumystaryna baǵyttalǵan arnaıy baǵdarlama aıasynda belgili arheologtar - Zeınolla Samashev pen Ábdesh Tóleýbaevtyń jetekshiligimen jáne álemniń 20 elinen kelgen ǵalymdardyń qatysýymen aımaqtyń mańyzdy arheologııalyq eskertkishterin zertteý jalǵasýda. Shilikti men Eleke Sazy qorymdarynan «Altyn adam» jáne «Úrjar hanshaıymy» artefaktileri tabylyp, «Uly Dala altyny» arnaıy ekspozıtsııasyna biriktirildi.
«Qazaqstan Respýblıkasy Táýelsizdiginiń 30 jyldyǵyn merekeleýdegi basty mindetimiz - belgilengen josparlardy iske asyrý, oblystyń áleýmettik-ekonomıkalyq damýynyń oń dınamıkasyn qamtamasyz etý, turǵyndardyń ómir súrý sapasyn jaqsartýǵa yqpal etý», - dep qorytyndylady Danıal Ahmetov.
