«Abaıdy «jer aýdarǵan» qandaı ákim?» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, keshe Aqordada Memleket basshysy Nursultan Nazarbaev Malaızııanyń Syrtqy ister mınıstri Dato Shrı Anıfa Amandy qabyldady. Áńgimelesý barasynda ekijaqty yntymaqtastyq máselesi talqylandy. «Meniń Qazaqstan Prezıdentimen jáne Úkimetimen budan ári jumys istep, tájirıbe almasyp, progress pen tabysty ortaqtasyp, ortaq maqsattarǵa qol jetkizgim keledi. Men Qazaqstan IKU-nyń tóraǵasy retinde dana kóshbasshylyǵyn tanytatynyna senemin. Ótken jyly EQYU-ǵa tóraǵa bolǵanyndaı, IKU-nyń tóraǵasy retinde de Qazaqstanda Batys pen Shyǵys arasyndaǵy qarym-qatynastardy nyǵaıtýda úlken múmkindikter bar», - dedi jýrnalısterge arnalǵan brıfıngte D.Aman.
Elimiz jıyrma jyldyq táýelsizdik tarıhyndaǵy taǵy bir asýdy alǵaly otyr. Ol asý - Qazaqstan Respýblıkasynyń Islam Konferentsııasy Uıymyna tóraǵalyq etýi. Osy oraıda «Egemen Qazaqstan» gazetinde QR SІM Erjan Qazyhanovpen aradaǵy suhbat jarııalandy. Suhbat barysynda osy tóraǵalyq qalaı júzege asyrylmaq, Tóraǵalyq barysynda Qazaqstan qandaı ustanymdardy basshylyqqa almaq, dúnıe dıdaryndaǵy musylman memleketteriniń basyn qosatyn uıymǵa jetekishilik jasaýdyń erekshelikteri nede degen syndy saýaldarǵa tuşymdy jaýap berilgen. Jaýapty qyzmetke kiriskeli beri baspasózde alǵash ret suhbat bergen mıınstrdiń jaýaptaryna qanyqqyńyz kelse, «EQYU-daǵy tájirıbe IKU-da kómektesedi» degen taqyrypqa nazar salyńyz.
***
Qaraǵandynyń irgesindegi Abaı atamyzdyń esimin 50 jyl buryn alǵan shaǵyn qalashyq bıyl jartyǵasyrlyq toıyn toılamaqshy. Danyshpan aqyn esimin ıelengen kent osy toıǵa saı jańaryp, jasarý jolynda bolsa kerekti. Jańalyqtyń kókesi qala tórindegi aqyn eskertkishin taǵynan taıdyrýdan bastalǵan tárizdi. Dál osy máseleni kótergen «Alash aınasy» gazeti búgingi nómirinde «Abaıdy «jer aýdarǵan» qandaı ákim?» degen taqyryppen maqala jarııalady. «Ornatylǵanyna kemi 40 jyl bolǵan uly Abaıdyń qaladaǵy jalǵyz eskertkishin el aman, jurt tynyshta ornanan alyp tastap, eleýsiz bir jaqqa «jer aýdaryp» jiberý aýdan ákimi Erkebulan Nasharovqa ne úshin kerek boldy eken?», - dep jazady basylym.
Osy basylymnyń turaqty «Dat!» aıdarynda fılologııa ǵylymynyń doktory, professor Qusaıyn Rysaldymen aradaǵy suhbat «Qazaq tiliniń máselesi ýshyǵyp turǵan mezette qabyldanbaǵan zań endi qashan qabyldanbaqshy?» degen taqyryppen berilgen. Basylym tilshisiniń barlyq saýaldaryna egjeı-tegjeıli jaýap bergen ǵalym: «Memlekettik tilimiz - qazaq tili. Til - qazaqtyń rýhy. Tildiń dárejesin kótere almaı otyrǵanymyz, ulttyq rýhty kótere almaı otyrǵanymyz dep túsiný kerek. Ol úshin elimizdi ulttyq memleket retinde qalyptastyrýymyz kerek. Sonda ǵana tolyqtaı ulttyq múddemiz úshin jumys isteıtin bolamyz», - deıdi.
***
Búgin Eýropalyq qaıta qurý jáne damý bankiniń jyl saıynǵy joǵary deńgeıdegi jınalysy men Іskerlik forýmy Astanada ashylady. Osyǵan oraı «Aıqyn» gazetinde «Qazaqstan álemdi asyraýǵa daıyn ba?» degen taqyryppen kólemdi maqala jaryq kórdi. Basylymnyń atap ótýinshe, osyǵan oraı Qazaqstan Prezıdenti Nursultan Nazarbaev resmı delegatsııalarmen kezdesip, EQDB basqarýshylary keńesiniń otyrysyn ashady dep kútilýde. Bir aıta keterligi, EQDB basqarýshylary keńesiniń jınalysy aıasynda keshe Táýelsizdik saraıynda ótken qazaqstandyq Investıtsııalyq forýmnyń ashylý saltanatynda EQDB prezıdenti T.Mıroý myrza qazaq elin endi álemdik azyq-túlik qoryna aınaldyrý týraly ıdeıa aıtqan.
«Aıqyn» gazetiniń jazýynsha, «Bolashaq» respýblıkalyq qozǵalysynyń ókilderi Qazaqstan zańymen uzaq merzimge sottalǵan Rahat Álıevti elge qaıtaryp, ádiletti sot ótkizýdi talap etip, «Biz ádildikti qalaımyz!» degen taqyrypta birqatar shara ótkizdi. Aldymen, Almatydaǵy Eýroodaq ókildiginiń aldynda shaǵyn mıtıng uıymdastyrǵan jastar keshe Ulttyq baspasóz klýbynda májilis uıymdastyrdy. Qozǵalys lıderi Dáýren Babamuratovtyń aıtýynsha, 2007 jyldyń aqpan aıynan bastap iz-tússiz joǵalǵan «Nurbank» top-menedjerleri Joldas Temirálıev pen Aıbar Hasenovtiń máıitteri 13 mamyr kúni tabyldy. Endi Avstrııa Rahat Álıevti dereý ekstradıtsııalaýǵa mindetti. Bul jaıynda basylymnyń búgingi nómirindegi «Elge qaıtarýdy talap etedi» degen maqaladan egjeı-tegjeıli bile alasyzdar.
***
«Keshe Aqordada Memleket basshysy Nursultan Nazarbaev BUU Damý baǵdarlamasynyń dırektory Helen Klarkti qabyldady», - dep jazady «Kazahstanskaıa pravda» gazeti. Basylymnyń atap ótýinshe, kezdesý barysynda taraptar ekijaqty qatynastardy odan ári nyǵaıtý jáne damytý máselesin talqylady. «Qazaqstan qazirgi ýaqytta óz damýynda az progress kórsetip otyrǵan eldermen óz tájirıbesi men bilimin bólisip, ondaı elderge qoldaý kórsetip keledi. Biz, BUU-nyń damý jónindegi jetekshi agenttigi retinde álemniń kóptegen elderimen jumys isteımiz jáne osy baǵytta Qazaqstanmen ózara qarym-qatynastarǵa úlken mán beremiz», - dedi jýrnalısterge arnalǵan brıfıng barysynda H.Klark.
