Abaıdy álemge nasıhattaýdyń jańa formatyna kóshýge tıispiz - D. Myńbaı
«Bıylǵy 2015 jyl mereıli merekeler, tarıhı tulǵalardyń mereıtoılar jyly bolyp otyr. Qazaq handyǵynyń qurylǵanyna 550 jyl, Sh. Ýálıhanovtyń týǵanyna 180 jyl, Abaıdyń týǵanyna 170 jyl, QHA men Konstıtýtsııamyzǵa 20 jyl tolyp otyr. Sonyń ishinde kemeńger oıshyl Abaı Qunanbaıulynyń murasyna arnalǵan búgingi konferentsııany osy kóp toılardyń betashary desek te bolady», - dedi jıyndy ashqan Darhan Myńbaı. «Jańa dáýir - Abaıdy urpaq pen álemge tanytýdyń jańa tásilderin de talap etedi. Bir kezderi mádenı yqpaldastyqtyń joly kórkem aýdarma ǵana bolsa, qazir onyń ártúrli taram-taram tásilderi bar. Máselen, sońǵy jyldary Abaı shyǵarmalary polıak, ıtalıan, túrik jáne taǵy basqa da tilderge aýdaryldy. Endi uly aqyn týraly tanymdyq derekti fılmderdi álem jurtshylyǵyna jetkizýimiz kerek. Buryn da, qazir de danyshpan Abaıdy álemge tanytqan M. Áýezovtyń «Abaı joly» ekeni belgili. Endi osy dúnıeni qosa alǵanda Abaı týraly dramalyq týyndylardy, shyǵarmalardy búgingi tehnologııany paıdalana otyryp, nasıhattaý mańyzdy», - dedi D. Myńbaı. Sharaǵa belgili abaıtanýshylar, ǵalymdar, qoǵam qaıratkerleri jáne Astana qalasyndaǵy bilim mekemeleriniń ustazdary men oqýshylary qatysty. Konferentsııa barysynda Abaıdyń alǵashqy shyqqan eńbekteri, shet tilderge aýdarylǵan týyndylary men aqyn jaıly arnaıy daıyndalǵan aýdıo-beıne rolıkter jáne Ulttyq mýzeı qoryndaǵy Abaı portretterinen shaǵyn kórme usynyldy.
