Abaıdyń shyǵarmalary sýretke aınaldy
ASTANA. KAZINFORM — Abaı Qunanbaevtyń shyǵarmalary qaǵaz betine sýret bolyp salyndy. Ondaǵy negizgi maǵynany jastarǵa jetkizýge tyrysqan sýretshi Ańsaǵan Mustafa Jibek Joly telearnasynyń «Búgin LIVE» stýdııasyna qonaq bolyp, suhbat berdi.
— Bul kartınalar Abaı atamyzdyń qara sózderi men óleńderindegi messedjdi qazirgi urpaqqa jetkizý úshin salyndy. Bylaı qarasaq, Abaı atamyz ómir boıy áleýmettik máselelerdi, adamdardyń teńsizdigin, qoǵamnyń dertin, bilim men oıdyń damýyn qozǵady ǵoı, — deıdi stýdııa qonaǵy.
Dál qazir Abaı Qunanbaıulynyń 180 jyldyq mereıtoıyna arnalǵan onkúndik aıasynda sýretshiniń «Kóńilge túrli oı salar» atty avtorlyq kórmesi uıymdastyrylyp jatyr.
— Qazir kartınalarymnyń túpnusqasy Semeıdegi kórmede tur. Ondaǵy 58 kartınany 1,5 jylda salyp shyqtym. Bir týyndyǵa shamamen 3 kún ketti. Sýretterimniń taǵy bir bóligi shetelderdi aralap ketti. Meksıkada, Brazılııadaǵy kórmelerge qatysty. Bir sýretimniń túpnusqasy Koreıadaǵy Hong-Mýn mýzeıinde. Meniń basty maqsatym — shyǵarmalarymdy kórgende, jetkizgim kelgen oıymdy barlyq adam birden túsinip, odan oı túıse eken, — deıdi Ańsaǵan Mustafa.
Óner ıesi Koreıa, Túrkııa, Argentına, Meksıka, Italııa, Frantsııa, AQSh, Japonııa, Iran, Polsha, Úndistan syndy ózge de memleketterde ótken túrli kórmelerge qatysqan.
— Men 30-dan astam elde 155 kórmege qatystym. Onyń on shaqtysynda júldeli boldym. Eń kóp marapat alǵan týyndym — «Bizdiń balalarymyz». Ol, eń arysy, Argentınanyń Ýshýaıa qalasyndaǵy kórmege qatysyp qaıtty, — deıdi sýretshi.
Ańsaǵan Mustafa sýret salýdan ózge, qazaqy naqyshtaǵy fýtbolkalardy da jasaıdy.
— Eń alǵashqy fýtbolkany Abaı atamyzdyń óleńindegi «Ózińe sen» degen tirkespen daıyndaǵan edim. Osydan 15 jyl buryn belgili saıt Abaı atamyzdyń óleńderi jazylǵan fýtbolkalardyń konkýrsyn ótkizdi. Bul bızneske kelýime de osy jaǵdaı sebep boldy, — deıdi ol.
Aıta keteıik, buǵan deıin Qazaqstanda Abaı esimdi qansha adam bar ekenin jazǵan edik.