Abaıdyń oı-tolǵamdary men ósıetteriniń ózektiligi eshqashan joǵalmaıdy - Prezıdent

ASTANA. KAZINFORM - Prezıdent Qasym-Jomart Toqaev Abaı Qunanbaıulynyń týǵanyna 180 jyl tolýyna oraı ótetin saltanatty is-sharaǵa qatysýshylarǵa quttyqtaý joldady, dep habarlaıdy Aqordanyń baspasóz qyzmeti.

-Qadirli qaýym! Sizderdi Abaı Qunanbaıulynyń týǵanyna 180 jyl tolýymen quttyqtaımyn! Abaı – tól mádenıetimizdi damytýǵa ólsheýsiz úles qosqan álemdik deńgeıdegi kemeńger tulǵa, halqymyzdyń sana-sezimin jańǵyrtqan uly aqyn. Ol jańa ádebıetimizdiń negizin qalap, dúnıetanymymyzdyń kókjıegin keńeıtti. Óskeleń urpaqty bilimpaz, eńbekqor, adal azamat bolýǵa shaqyryp, ulttyń jańa sapasyn qalyptastyratyn qasıetterdi keńinen dáriptedi. Otanǵa degen súıispenshiliktiń jáne el múddesi úshin qaltqysyz qyzmet etýdiń ozyq úlgisin kórsetti,-delingen quttyqtaýda.

Sondaı-aq onda Memleket basshysy hákim Abaıdyń mol murasy – qazaq halqynyń ǵana emes, barsha adamzattyń ónege alatyn asyl qazynasy ekendigine toqtaldy.

- Onyń oı-tolǵamdary men ósıetteriniń ózektiligi eshqashan joǵalmaıdy. Sondyqtan Abaıdy taný jáne tanytý, shyǵarmashylyǵyn tereń zerdeleý óte mańyzdy. Búgingi saltanatty is-sharanyń túpki máni de – osynda. Bul óńir – Abaımen qatar Shákárim Qudaıberdiuly, Muhtar Áýezov syndy ulttyń uly perzentterin dúnıege ákelgen kıeli ólke. Memleket osy aımaqty ulttyq qundylyqtar mekeni retinde órkendetýge basa mán beredi. Uly oıshyldyń ómirsheń óleńderi men qasterli qara sózderi áli talaı urpaqqa rýhanı azyq bolary anyq. Uly Abaıdyń amanatyna adal bolaıyq!, - delingen Memleket basshysynyń qutyqtaýynda.

Osyǵan deıin jazǵanymyzdaı, 10 tamyz qazaq halqynyń uly aqyny Abaı Qunanbaıulynyń týǵan kúni. Bul kún 2020 jyldan beri «Abaı kúni» retinde resmı túrde atap ótiledi.