Abaıdyń naqyl sózderi jazylǵan stendti búldirgen adam qamaýǵa alyndy

ASTANA. KAZINFORM - Astanada Abaıdyń naqyl sózderi jazylǵan stendti búldirgen er adam ustaldy, - dep jazdy Polisia.kz.

Elordada Syǵanaq kóshesindegi alleıada 49 jastaǵy er adam konstrýktsııany syndyrǵan jáne uly qazaq aqyny Abaı Qunanbaevtyń naqyl sózderi jazylǵan plakatty jyrtyp tastaǵan. Ol óz áreketimen qoǵam men mádenı qundylyqtarǵa ashyq túrde qurmetsizdik tanytyp, kórnekti tarıhı tulǵanyń rýhyna nuqsan keltirdi. Mundaı qadam qoǵamda narazylyq týdyryp, mádenı mura nyshanyn qorlaý retinde baǵalanýy múmkin.

Atalǵan fakt boıynsha quqyq buzýshyǵa qatysty ákimshilik hattama toltyryldy. Sot sheshimimen ol 20 táýlikke qamaýǵa alyndy.

«Zań men Tártip» qaǵıdatyn júzege asyrý aıasynda elordalyq polıtsııa vandalızmniń aldyn alýǵa jáne bóten múlikti qasaqana búldirý faktileriniń jolyn kesýge erekshe nazar aýdarady.

Jyl basynan beri bóten múlikti qasaqana búldirý boıynsha 131 quqyq buzýshylyq tirkelgen.

Polıtsııa qoǵamdyq tártipti buzyp, múlikti ádeıi búldirýge baǵyttalǵan kez kelgen áreket zań aıasynda qatań túrde toqtatylatynyn eskertedi jáne azamattardy qoǵamdyq múlikke uqypty qarap, quqyq buzýshylyqtar týraly «102» arnasyna dereý habarlaýǵa shaqyrady.

Bútindi búldirip, qıratyp júretin balalardyń keıbiri ózine nazar aýdarǵanyn qalaıdy, keıbiriniń ómirge ókpesi bar. Bul balalardyń ata-anasy Ákimshilik quqyq buzý kodeksiniń eki baby boıynsha jaýapqa tartylady. Bala nege aınalasyna qyrǵıdaı tıedi? Vandalızmmen kúreste kim jeńdi? Osy jaıly materıal jazǵan bolatynbyz.