«Abaıdyń qara sózderi» ıÝNESKO-nyń «Álem jady» tizilimine enýi múmkin

ASTANA. KAZINFORM — Premer-mınıstrdiń orynbasary, Mádenıet jáne aqparat mınıstri Aıda Balaeva Úkimet otyrysynda qazaq álemin ıÝNESKO aıasynda nasıhattaý baǵytyndaǵy jumystar qaı baǵytta jalǵasatynyn baıandady.

— Memleket basshysynyń tapsyrmasymen Jarkent meshiti men Voznesensk soboryn biriktiretin nomınatsııa, Qarataý jotasyndaǵy petroglıfterdi ıÝNESKO-nyń Búkilálemdik muralar tizimine engizý baǵytynda tıisti jumystar atqarylady. ıÝNESKO qaǵıdalaryna saı 2026-27 jyldary nomınatsııalyq qujattama jasalyp, odan keıingi jyldary naqty sheshim qabyldanady, — dedi vıtse-premer.

Mınıstr «Ulttyq tsıfrlyq mura» jobasyn iske asyrý bastamasy jandanatynyn aıtty.

— «Abaıdyń qara sózderin» ıÝNESKO-nyń «Álem jady» tizilimine engizý úshin tıisti qujattar saraptamalyq baǵalaýǵa joldandy. «Ulttyq tsıfrlyq mura» jobasy Qazaqstannyń tarıhı, mádenı jáne ǵylymı murasyn saqtaý, júıeleý jáne tanystyrýǵa arnalǵan biryńǵaı ulttyq tsıfrlyq platforma qurý retinde qarastyrylyp otyr. Jobany iske asyrý barysy erekshe baqylaýda bolady, — dedi Aıda Balaeva.

Eske salsaq, keshe Ulttyq quryltaıdyń aqyrǵy otyrysy ótip, mádenıet pen rýhanııat salasynda tyń usynystar aıtylǵan bolatyn. 

Buǵan deıin mass-medıadaǵy taýarlardyń keıbir túrine salynǵan tyıym kúshin joıýy múmkin ekeni anyqtaldy.