Abaıdyń «Qara sózderi» ortaq túrki álipbıinde jaryq kórdi
ALMATY. KAZINFORM — Halyqaralyq Túrki akademııasy Abaı Qunanbaıulynyń 180 jyldyǵyna oraı, birneshe basylymnyń tusaýyn kesti.
Basqosýda alǵash ret 1954 jyly Bakýde kırıll qarpimen jaryq kórip, sodan beri qaıta basylmaǵan Muhtar Áýezovtiń «Abaı joly» roman-epopeıasynyń «Abaı» dep atalatyn alǵashqy eki kitaby ázerbaıjan tilinde qazirgi latyn álipbıine aýdarylyp jaryq kórdi.
Sonymen birge Abaı Qunanbaıulynyń «Qara sózderi» ortaq túrki álipbıi negizinde shyǵaryldy jáne qazaq abaıtanýshysy Qaıym Muhamedhanovtyń «Abaıdyń muragerleri» eńbegi túrik tiline aýdaryldy.
Jıynda sóz sóılegen Túrki Akademııasynyń prezıdenti, akademık Shahın Mustafaev Abaı murasy tek qazaq halqynyń ǵana emes, búkil túrki órkenıetine ortaq qundylyq ekenin atap ótti.
— Túrki Akademııasynyń jańa basylymdary — uly oıshylǵa degen qurmetpen qatar, túrki álemindegi mádenı birlik pen sabaqtastyqty nyǵaıtýǵa baǵyttalǵan mańyzdy qadam, — dedi Sh. Mustafaev Almatyda Abaıdyń rýhanı murasyna arnalǵan halyqaralyq konferentsııada.
Sondaı-aq, Qazaqstan Ulttyq ǵylym akademııasynyń prezıdenti Aqylbek Qúrishbaev konferentsııaǵa qatysýshylarǵa beıneúndeý arqyly quttyqtaý sózin joldady.
Aıta keteıik, Túrki áleminiń ortaq álipbıi komıssııasy 34 áripten turatyn úlgi usynǵan edi.
Eske sala ketsek, túrki halyqtarynyń tarıhy týraly eki tomdyq jınaq shyǵady. Birinshi tom geografııa, saıası jáne etnıkalyq tarıh jaıynda bolsa, ekinshi kitapta mádenıet jaǵy qamtylmaq.