Abaıdyń 180 jyldyǵyna oraı Mańǵystaý oblysy Semeıge Dostyq úıin salyp bermek
SEMEI. KAZINFORM - Mańǵystaý oblysy Semeı qalasyna Dostyq úıin salyp berý úshin arnaıy delegatsııa jiberdi.
Abaıdyń 180 jyldyǵyna oraı Memleket basshysy Qasym-Jomart Toqaevtyń qoldaýymen «Abaıǵa qurmet» aktsııasy bastalǵan bolatyn. Aktsııa aıasynda eldiń ár óńiri Abaı oblysyna bir nysannan tartý etedi.
- Búgin oblys ákimi Berik Ýálı óńirge Mańǵystaý oblysynan arnaıy kelgen delegatsııa múshelerimen kezdesti. Mańǵystaý oblysy ákimdigi aktsııaǵa qoldaý bildirip, Semeı qalasyna Dostyq úıin salyp bermek, - dep habarlady Abaı oblysy ákiminiń baspasóz qyzmetinen.
Berik Ýálı «Abaıǵa qurmet» aktsııasyn eldiń barlyq óńiri qyzý qoldap jatqanyn, Túrkistan, Aqtóbe, Qyzylorda, Pavlodar, Jetisý, Almaty, Soltústik Qazaqstan, Shyǵys Qazaqstan, Batys Qazaqstan, Atyraý, Jambyl, Aqmola oblystary men Shymkent, Almaty, Astana qalalary tıisti jumystardy bastap ketkenin aıtty.
Mańǵystaý oblysy ákiminiń birinshi orynbasary Erbol Іzbergenov munaıly ólke jurtynyń sálemin jetkizdi.
- Kórshisi sharýa bastap jatsa, qasynan qur ótip ketpeıtin qazaqpyz ǵoı. Ár oblystyń tartý jasaýy óte durys qabyldanǵan sheshim dep esepteımiz. Óıtkeni bul nysandar halyqtyń ıgiligine jumys isteıtin bolady. Igi bastamalaryńyzǵa sáttilik tileımiz, - dedi ol.
Eske salsaq, osyǵan deıin Abaı oblysy ákimdiginde jıhaz satyp alý konkýrsy toqtatylǵany habarlanǵan.