Abaıdyń 180 jyldyǵyna arnalǵan alaman báıgede Pavlodardyń jylqysy birinshi keldi
SEMEI. KAZINFORM — Abaıdyń 180 jyldyǵyna arnalǵan sporttyq saıystardyń jeńimpazdary belgili boldy.
Búgin uly aqynnyń 180 jyldyq mereıtoıyna arnalǵan onkúndiktiń sońǵy kúni Abaı aýdany Qaraýyl aýylynda atalyp ótildi. Oǵan 50 myńǵa jýyq adam jınaldy. Jalpy osy 10 kún ishinde 100-ge jýyq shara ótken.
Ulttyq sporttyń birneshe túrinen saıystar da uıymdastyryldy. «Jeti qazyna» festıvali aıasynda jorǵa jarysy, top báıge (16 shaqyrym) men alaman báıge (25) ótti. Qazaq kúresinen «Túıe palýan» (90 keliden joǵary) men «Ógiz palýan» (74 kelige deıin) anyqtaldy.
— Júldeli oryndarǵa ıe bolǵan sportshylarǵa oblystyń demeýshileri atynan jalpy sany 90 jylqy men 10 avtokólik syılyq retinde berildi. Erekshe atap óterligi, uly Abaıdyń jaqsy kórgen oıyny toǵyzqumalaq saıysy men 180 shaqyrymdyq ýltramarafonǵa elimiz boıynsha tuńǵysh ret avtokólik syıǵa tartyldy. Semeı men Qaraýyl arasyn 19 saǵat, 9 mınýtta júgirip ótken Baýbek Ilıasov (Batys Qazaqstan oblysy) jarys jeńimpazy atandy. Toǵyzqumalaq saıysynda shymkenttik Ǵalymjan Temirbaev birinshi oryndy ıelendi. «Túıe balýan» saıysynda mańǵystaýlyq Nurdáýlet Jarylǵapov, «Ógiz palýan» saıysynda almatylyq Jiger Erkinuly qarsylas shaq keltirmedi. «Top báıgede» Almaty oblysynyń, «Alaman báıgede» Pavlodar qalasynyń, jorǵa jarysynda Qyrǵyzstannyń júırigi top jardy. Júldegerlerdiń barlyǵy kólikti boldy. «Jeti qazyna» festıvaliniń jeńimpazdary júldege jylqy aldy, — dep habarlady oblys ákimdiginen.
Aımaq basshysy Berik Ýálı mereıtoılyq onkúndik aıasynda toı toılaýǵa emes, oı oılaýǵa, rýhanı, zııatkerlik, tanymdyq, sporttyq sharalarǵa basa mán berilgenin aıtty.
— Jalpy 10 kúndik is-sharalar eldiń bereke-birliginiń arqasynda joǵary deńgeıde ótti dep esepteımin. «Abaı akademııasy» atty entsıklopedııalyq portal ashyldy. Birneshe kitaptyń tusaýy kesildi. Myńnan astam komanda qatysqan «Abaı kýız» ıntellektýaldyq oıyny ótkizildi. Zaǵıp jandar men nashar kóretin azamattarǵa arnalǵan kitaphana iske qosyldy. Búgin ózderińiz kórgendeı, júlde qorlarynyń ár aımaqqa, tipti qyrǵyz eline deıin ketkeni qýantady. Osy rette toıdyń joǵary deńgeıde ótýine atsalysqan oblystyń janashyr azamattaryna alǵys aıtamyn, — dedi ákim.
Eske salsaq, osyǵan deıin Abaı oblysynda «Abaı kúni» qalaı ótip jatqany jaıly jazǵanbyz