Abaıdyń 180 jyldyǵy: elordada qandaı is-sharalar ótip jatyr

ASTANA. KAZINFORM – Búginde el aýmaǵynda qazaqtyń bas aqyny Abaı Qunanbaıulynyń 180 jyldyq mereıtoıy atalyp ótilip jatyr. Osy oraıda elordada ótetin is-sharalar týraly Astana qalasy Tilderdi damytý basqarmasy basshysynyń mindetin atqarýshy Dosjan Isabek aıtyp berdi.

- Astana qalasynda Uly Abaıdyń 180 jyldyq mereıtoıyna oraı 140-tan astam is-shara josparlanǵan, búginde olar ótip jatyr. Atap aıtqanda, 10 tamyzda Abaıdyń týǵan kúni elordadaǵy eskertkishine gúl shoǵyn qoıý rásimi ótedi. Odan keıin 8 tamyz ben 11 tamyz aralyǵynda Abaıdyń týǵan jerine arnaıy ekspedıtsııa jiberildi. Onyń quramynda abaıtanýshylar, tarıhshy, ádebıetshi ǵalymdar, qoǵam qaıratkerleri men BAQ ókilderi bar. Kelesi is-shara «Dombyra party» 10 tamyz kúni «Kerýen» saýda ortalyǵynyń janynda keshki saǵat 19:00-de ótedi. Іs-shara barysynda qonaqtar qazaqtyń qara dombyrasymen Abaıdyń ánderi men kúılerin tyńdap, aqynnyń jyrlary men danalyq sózderine qanyǵatyn bolady. Keshtiń maqsaty – uly oıshyldyń murasyn dáripteý, nasıhattaý, - dedi Dosjan Isabek ortalyq kommýnıkatsııalar qyzmeti alańynda ótken baspasóz máslıhatynda. 

Sonymen qatar aqyn mereıtoıyna oraı elorda turǵyndary men qonaqtaryna án shashý tartylady. 

- R. Baǵlanova atyndaǵy №2 mýzyka mektebiniń oqýshylary qalalyq jalpy bilim beretin mektep oqýshylarymen birlesip merekelik án shashý uıymdastyrady. Іs-shara barysynda 5 myńnan astam bala bir sátte Abaıdyń ánin oryndaıdy. Kelesi Sintez teatry «Abaı 45» degen ataýmen qoıylym usynǵaly otyr. Bul stýdentterden jasaqtalǵan teatr ujymy. Odan bólek kontserttik-teatrlandyrylǵan qoıylymdar, kontsertter men kýız ótedi, - dep tolyqtyrdy spıker. 

Bıyl elimizde uly aqyn Abaı Qunanbaıulynyń 180 jyldyǵy qalaı atalyp ótetini týraly jazǵan edik. 

Búgin Semeıde Abaıdyń 180 jyldyǵyna oraı respýblıkalyq aqyndar aıtysy ótip jatyr.