Abaıdyń 180 jyldyǵy: Astanada aqynnyń qara sózderine negizdelgen qoıylymnyń premerasy ótti
ASTANA. KAZINFORM — Astanadaǵy Ázirbaıjan Mámbetov atyndaǵy memlekettik drama jáne komedııa teatrynda Abaı Qunanbaıulynyń 180 jyldyǵyna arnalǵan «45» atty plastıkalyq qoıylymnyń premerasy ótti. Bul týraly elorda ákimdigi málim etti.
Abaıdyń qara sózderin arqaý etken qoıylymda naqty keıipker joq. Plastıka men ánge órilgen qoıylymda akterlar aqynnyń halyqqa aıtqan ósıetin nasıhattaıdy.
Qoıylymnyń rejısseri — máskeýlik Ilıa Podchezertsev. Onyń aıtýynsha, klassıkalyq mátinder plastıkalyq óner tilinde jańasha beınelenip, poezııa men qozǵalystyń úılesimdi birligin kórsetedi.
— Qoıylymǵa daıyndyq Muhtar Áýezovtiń «Abaı joly» kitaptaryn oqýdan bastaldy. Keıin aqynnyń qara sózderin oqyp shyqtym. Ózderińizge málim, Abaıdyń qara sózi búginde ózektiligin joıǵan emes. Qoıylym fılosofııalyq tereń maǵynaǵa ıe. Onyń aıtar oıy bar. Munda adamnyń bılikke talasqysh, jalqaý bolatynyna, ǵylym, aqyldyń jarysy, sondaı-aq rýhanı qundylyqtardan kórinister qoıylady, — dedi máskeýlik rejısser.
Ilıa Podchezertsevtiń rejısserlik sheshiminiń arqasynda Abaıdyń fılosofııalyq oıy sahnalyq plastıka arqyly kórermenge jetkiziledi.
— Abaıdyń qara sózderin is-áreket, qımyl arqyly jetkizý rejısserdiń talaby boldy. Plastıka arqyly qara sózderin tyńdap, kórermen búgingi qoǵamda bolyp jatqan jaǵdaılardy kóredi, — dedi Ázirbaıjan Mámbetov atyndaǵy memlekettik drama jáne komedııa teatrynyń aktrısasy Aqbota Mákejanova.
Aıta keteıik, «Astana Balet» teatry halyqaralyq festıvalde kúmis júldege ıe boldy.