Abaıdaǵy basseın qurylysyn Eýrazııalyq top qarjylandyrady
ASTANA. QazAqparat - Eýrazııalyq top (ERG) 2018 jyly «Týǵan jer - Týǵan qalalar» baǵdarlamasyn bastady. Ol kompanııa jumys jasaıtyn aımaq ákimdikterimen birlese iske asyrylady, dep habarlaıdy Qaraǵandy oblysy ákimdiginiń baspasóz qyzmeti.
«Baǵdarlama Eýrazııalyq Top ótkizgen keshendi áleýmettik zertteýler negizinde ázirlengen. Óńirlerdegi naqty qajettilikterdi anyqtaý qorytyndysy boıynsha qarajat endigi jerde tek jergilikti turǵyndarǵa qajetti jobalarǵa baǵyttalady. Baǵdarlama maqsattarynyń biri - jas mamandardy týǵan qalalarynda ómir súrýge jáne jumys isteýge yntalandyrý», - delingen kompanııanyń baspasóz qyzmeti taratqan aqparatta.
Abaı qalasynda jabyq basseın qurylysyn bastaý, Qaraǵandyda kórý qabileti nasharlaǵan balalarǵa arnalǵan mektep-ınternat qurylysyn aıaqtaý josparlanǵan. Sonymen qatar kompanııa óz qarajaty esebinen «Qyzyljar-Shubarkól-Barshyn-Qorǵaljyn-Astana» avtojoldaryn jóndemek. Shubarkól jáne Barshyn kentteriniń ınfraqurylymyn damytýǵa qarjy qarastyrylǵan.
2017-2018 jyldarǵa arnalǵan áleýmettik mańyzdy jobalardy júzege asyrýdaǵy ózara yntymaqtastyq týraly ERG men Qaraǵandy oblysynyń ákimdigi arasynda jasalǵan Memorandým aıasynda Jańaarqa aýdanyndaǵy Qyzyljar kentiniń ákimshiligine jol talǵamaıtyn avtokólik tartý etti.
Kompanııa baspasóz qyzmetiniń aqparatyna saı, 2017 jyly memorandýmǵa sáıkes, ERG óńirdiń áleýmettik salasyn qoldap 182,6 mln teńge baǵyttaǵan. Sonyń 41 mln. teńgesi Shubarkól kenti qazandyǵynyń jabdyqtaryn jóndeý men onyń turaqty jumysyn qamstamasyz etýge jumsaldy. 51 mıllıony Shahtınsk qalasy men Shahan kkentindegi turǵyn úılerdiń qazandyqtaryn jeke shyǵarýǵa bólingen. Sonymen qatar, «Shubarkól kómir» AQ tegin 3 000 tonna kómir bólip, Qyzyljar kentiniń turǵyndaryn kómirmen qamtamasyz etti.
«Shubarkól kómir» AQ Eýrazııalyq top quramyna enedi. Óndiristik qyzmetiniń basty baǵyttary: kómirdi ashyq ádispen óndirý. Qyzmettiń basqa da túrleri - spetskoks óndirý, koks gazynan elektr qýatyn óndirý. Kásiporynda 2800 adam eńbek etedi.
ERG - kásiporyndary qazyp shyǵarý, óńdeý, energetıka, logıstıka jáne marketıng salalarynda tolyq biriktirilgen, tabıǵı qorlardy óńdeıtin álemdegi eń iri ártaraptandyrylǵan kompanııalardyń biri bolyp tabylady. Tórt qurlyqta ornalasqan 14 elde Eýrazııalyq Toptyń kásiporyndary men bıznesti damytý jobalary jumys isteýde. Basqarýshy kompanııanyń bas keńsesi Lıýksembýrgte ornalasqan. ERG - Qazaqstannyń taý-ken, metallýrgııa salasynyń úshten birin quraıdy.
