Abaıdaǵy jaıylym tapshylyǵy, ınternet pen jol problemalary: depýtat turǵyndar muńyn tyńdady
ASTANA. KAZINFORM – Májilis depýtaty Nurtaı Sabılıanov Abaı oblysy Jarma aýdanyna qarasty Qońyrbıik, Kishi Qarasý jáne Salqyntóbe aýyldarynyń turǵyndarymen kezdesti.
Onda aýyl joldaryn jóndeý, aýyzsýmen qamtý, jumyssyzdyqty azaıtý sııaqty birqatar ózekti másele kóterildi. Qońyrbıik aýylynda aqsaqaldar jaıylym jerlerdiń jetispeýshiligin aıtty. Jergilikti turǵyndardyń aıtýynsha, mal bar, alaıda ony jaıatyn jer tapshy.
Nurtaı Sabılıanov sońǵy úsh jylda partııanyń «Jer amanaty» komıssııasynyń arqasynda 12 mıllıon gektardan astam zańsyz alynǵan jaıylym jerler memleketke qaıtarylǵanyn atap ótti. Tek byltyrdyń ózinde Abaı oblysynda 550 myń gektar aýyl sharýashylyǵy jeri halyqqa qaıtarylǵan.
– Memleket basshysynyń tapsyrmasy boıynsha jýyrda ǵana «Jaıylymdar týraly» zań qabyldandy. Bul zańda qoǵamdyq jaıylymdar jaıly jańa normalar engizilip, jaıylymdardy konkýrssyz úlestirýge, olardy basqa maqsattaǵy aýyl sharýashylyǵy alqaptaryna aýystyrýǵa tyıym salynady. Sonymen qatar bir gektarǵa shaqqandaǵy mal jaıylymynyń normatıvi 20%-dan 50%-ǵa deıin artty, – dedi depýtat.
Sonymen qatar Qonyrbıik aýylynda ınternet jelisine qosylý, medıtsınalyq pýnkt ashý, jedel járdem kóligin bólý, mektepke sportzal salý jáne aýyz sýǵa qoljetimdilikti arttyrý máseleleri de kóterildi.
AlKishi Qarasý aýylynyń turǵyndary áıelderdiń zeınet jasynyń tómendetilýin usynyp, aýylǵa joǵary jyldamdyqty ınternet tartýdy surady. Turǵyndar Semeı ıadrolyq polıgonynyń zardabyn tartqan azamattarǵa jeńildikter berý máselesin de qozǵady.
– Memleket ıadrolyq synaqtardyń zardabyn tartqan azamattardy umytpaıdy. 1992 jyldan beri arnaıy áleýmettik qorǵaý júıesi jumys istep keledi. Bul – merziminen buryn zeınetke shyǵý, ómir súrý jyldary úshin ótemaqy tóleý, eńbek ótilin keńeıtý jáne medıtsınalyq kómek alý kezinde jeńildikter. Bul kepildikter saqtalǵan jáne óz kúshinde. Al eki jyl buryn «Semeı ıadrolyq qaýipsizdik aımaǵy týraly» jańa zań qabyldandy. Ol ekologııany qalpyna keltirýge, jerdi qorǵaýǵa, monıtorıng pen qaýipsizdikti qamtamasyz etýge baǵyttalǵan. Bul – halyqty qoldaýǵa arnalǵan kezekti naqty qadam, – dedi Nurtaı Sabılıanov.
Sondaı-aq depýtat 2021 jyly partııanyń saılaýaldy baǵdarlamasy aıasynda Semeı qalasynda ıAdrolyq medıtsına jáne onkologııa ortalyǵy ashylǵanyn eske saldy. Qazirgi tańda onda onkologııalyq aýrýlarmen qatar radıatsııalyq áser saldarynan densaýlyǵynda kinárat bar turǵyndar da em alyp júr.
Salqyntóbe aýylynda basty máseleler retinde joldyń joqtyǵy, eskirgen elektr jelileri jáne abattandyrýǵa arnalǵan bıýdjettiń jetkiliksizdigi ataldy. Sonymen qatar jastardy tartý men jumys oryndaryn ashý – ózekti máselelerdiń biri retinde kóterildi.
Nurtaı Sabılıanov «Aýyl amanaty» partııalyq jobasy arqyly 2,5 paıyzben jeńildetilgen shaǵyn nesıe berý jalǵasyp jatqanyn aıtyp, búginde oblysta ondaǵan turǵyn osy múmkindik arqyly fermerlik sharýashylyqtar ashyp, jylyjaılar salyp, mal satyp alyp jatqanyn jetkizdi. Qazirgi tańda 350 adam osy jobanyń ıgiligin kórgen. Al qaryz máselesi bar aýyl turǵyndary úshin «Qaryzsyz qoǵam» jobasy belsendi jumys isteýde. Joba aıasynda qatysýshylar qarjylyq saýattylyq boıynsha bilim alyp qana qoımaı, qaryzdaryn qaıta qarjylandyrý, qarjylyq saýyqtyrý josparlaryn ázirleý boıynsha sarapshylardan tegin kómek alady.
Depýtat Memleket basshysynyń jergilikti ózin-ózi basqarýdy kúsheıtýge baǵyttalǵan saıası reformalarynyń mańyzdylyǵyna toqtaldy.
– Búginde aýyl turǵyndarynyń ashyq sóıleı bastaýynyń ózi – ózgeristerdiń nátıjesi. Buryn kim basqaratynyn ózińiz sheshpeıtin edińizder. Qazir ózderińiz tańdaısyzdar. Ákimdi halyq ózi saılaıdy, bul – jaı ǵana demokratııa emes, bul – tikeleı bılik. Bul – Prezıdent Qasym-Jomart Toqaevtyń reformasy. «AMANAT» partııasy Prezıdenttiń basty qoǵamdyq tiregi retinde ákim saılaýlarynyń ashyq, ádil jáne halyqtyń belsendi qatysýymen ótýine qol jetkizdi. Saılanǵan ákimder óz saılaýshylarynyń aldynda kóbirek jaýapkershilik sezinedi. Eger ákim durys jumys istemese, ony keri shaqyryp alý quqyǵy halyqtyń qolynda», – dedi Nurtaı Sabılıanov.
Aıta keteıik, depýtat Almatyda 40 qabatty keshen salýǵa qarsy shyqty.