«Abaı» jýrnalynyń joǵalǵan sany tabyldy
ÓSKEMEN. QazAqparat - «Abaı» jýrnalynyń 100 jyldyq mereıtoıy qarsańynda buryn joǵaldy delinip kelgen 12 sany tabyldy, dep habarlaıdy QazAqparat tilshisi.
Bul týraly oblystyq Pýshkın atyndaǵy kitaphanada ótken Abaı jýrnalynyń 100 jyldyǵyna arnalǵan ádebı-tarıhı keshte málim boldy. Súıinshi jańalyqty jýrnaldyń bas redaktory Muratbek Ospanovpen birgen kelgen ál-Farabı atyndaǵy QazUÝ ǵalymdary Altyn Aqynbekova men Rızagúl Bakenova jetkizdi.
«Buǵan deıin keıbir zertteýshiler 1918 jyly jýrnaldyń tek 11 sany ǵana jaryq kórdi degen pikir aıtyp júrgen. Biz 12 sany jaryq kórgenine sendik. Óıtkeni, Muhtar Áýezovtiń keıbir jýrnalǵa shyqty degen maqalalarynyń tizimdikte aty bar da, ózi joq bolatyn. Sol maqalalar sońǵy sannyń ishinde eken» - deıdi jýrnaldyń bas redaktory Muratbek Ospanov.
Jýrnaldyń joǵalǵan sanyn jas ǵalym Altyn Aqynbekova ótken jyly Almatydaǵy Muhtar Áýezov atyndaǵy murajaıdan tapqan.
«Abaı» jýrnalyn shyǵarý uly aqynnyń dúnıeden ótkenine 10 jyl tolýyna baılanysty Semeı qalasynda ótken basqosýda qolǵa alynǵan. Biraq azamattyq soǵystyń bastalyp ketýine baılanysty birneshe jyl keshigip baryp iske asady. Bastaqyda jýrnal aıyna eki ret shyǵady dep kózdelgenimen, tek aqpan aıynda ǵana bul jospar iske asady. Qalǵan ýaqytta aıyna bir retten shyǵyp otyrady. Sońǵy tabylǵan 12 nómiri qarjy tapshylyǵy sebebinen biryńǵaı sary qaǵazǵa basylǵan», - deıdi Altyn Aqynbekova.
Atalmysh jýrnaldyń jaryq kórýine muryndyq bolǵan Júsipbek Aımaýytov pen Muhtar Áýezov bolǵan. Qos dúldil sol kezde «Ekeý» degen atpen úzbeı maqala jazyp otyrǵan. Ár san Abaıdyń ǵaqlııa sózderimen bastalǵan. Jýrnal táýelsizdik alǵan soń qaıta jaryq kóre bastady. Basylymnyń qaıta jaryq kórýine Alashordanyń sońǵy tuıaǵy Qaıym Muhamedhanov sebepker boldy. Shara barysynda Qaıym Muhamethanov atyndaǵy bilim men mádenıet ortalyǵynyń dırektory Dına Qaıymqyzy onlaın baılanysqa shyǵyp, ákesiniń izi qalǵan jýrnaldyń mereıtoıymen quttyqtap, oı bólisti.
Ádebı-tarıhı keshti uıymdastyrǵan kitaphana qyzmetkerleri jınalǵan jurtty «Bizdiń Abaı» elektrondy kitaphanasyndaǵy «Abaı» jýrnalynyń 1992 jyldan beri shyqqan barlyq sanynyń elektrondy nusqasymen tanystyrdy.
