«Abaı jolyn» 3 sekýndta jańa álipbı júıesine aýdarýǵa bolady - Bilál Qýanysh

ASTANA. QazAqparat - «Aldaǵy ýaqytta qoldanysqa enetin «Attila group» kompanııasy jasaǵan konverter tildiń damýyna kepildik bermek». Búgin Májiliste ótip jatqan «Memlekettik tildiń latyn grafıkasyndaǵy álipbıiniń biryńǵaı standartyn engizý máseleleri týraly» parlamenttik tyńdaý kezinde «Qamshy» aqparat agenttiginiń jetekshisi, «Attila group» ınternet kompanııasynyń ókili Bilál Qýanysh osylaı dedi, dep habarlaıdy QazAqparat.

Bilál Qýanysh óz sózinde osy konverterdiń artyqshylyqtaryna toqtala ketti: «Birinshisi, bizdiń mamandarymyz on jyldan beri zerttep kele jatqan qazaq álipbıleriniń konverter júıesi osy kúnge deıin álem qazaqtary paıdalanyp kele jatqan kırıll, latyn, tóte jazýlardy bir-birine qateliksiz aýdara alatyn biregeı júıe. Bul júıe osyǵan deıin «Egemen Qazaqstan», «QazAqparat» agenttikterinde qoldanylyp, basqa elderdegi otandastarymyz paıdalandy. Sondaı-aq, tóte jazýmen oqıtyn Qytaı qazaqtary da, latyn álipbıimen oqıtyn Eýropa qazaqtary da osy konverter arqyly jańa álipbıdegi málimetti oqı alady».

Odan bólek, spıkerdiń sózinshe kópjyldyq tájirıbeden ótken osy konverter júıesi endigi kezekte memlekettik tildiń biryńǵaı standartty álipbıin halyq arasynda óte yńǵaıly, qoljetimdi turǵyda nasıhattap, tez qoldanysqa enýine aıryqsha qyzmet etpek.

«Mysaly Siz kırıll álipbıimen oqyǵan adam bolsańyz, «Attila group» kompanııasy jasaǵan konverter júıesin kompıýterińizge nemese uıaly telefonyńyzǵa ornatý arqyly kez kelgen ýaqytta kez kelgen mátindi jańa álipbı nusqasyna aýdara alasyz. Tipti «Abaı joly» romanyn 3 sekýnd aralyqta jańa álipbı júıesimen oqýǵa múmkindigińiz bolady. Bul konverterdi kez kelgen kompıýterge, uıaly telefonnyń kez kelgen nusqasyna, kez kelgen programmalyq quraldarda paıdalanýǵa múmkindik bar», - dedi ol.

Eskeretin bir jaıt, Memlekettik tildiń latyn grafıkasyndaǵy biryńǵaı standartty álipbıi halyqqa tanystyrylǵan soń «konverter júıesi» Memleket belgilegen bir ǵana nusqamen jasalatyn bolady.

Aıta keteıik, "QazAqparat" HAA sheteldegi otandastarymyz úshin 2004 jyly latyn álipbıindegi nusqasyn, 2009 jyly tóte jazýdaǵy nusqasyn iske qosty.