«Abaı joly» roman-epopeıasynyń qytaı tilindegi nusqasynyń tanystyrylymy boldy
ALMATY. 22 aqpan. QazAqparat /Ádilet Musahaev/ - Ál-Farabı atyndaǵy Qazaq Ulttyq ýnıversıteti apparatynyń jetekshisi Qaırat Júsipov halyqaralyq qatynastar fakýltetiniń oqytýshylary men stýdentterin qazaqtyń tanymal jazýshysy M.Áýezovtyń «Abaı joly» roman-epopeıasynyń qytaı tilindegi aýdarmasymen tanystyrdy.
Tárjima qytaılyq aýdarmashylar Ha-Baı men Gao Sýn-Fan tarapynan oryndalyp, kórkem bezendirilgen qalyń muqabaly kitap túrinde Beıjińde Qazaqstannyń tanymal memlekettik qaıratkeri, QR Parlamenti Májilisi tóraǵasynyń orynbasary Jánibek Káribjanovtyń kómegimen basylyp shyqqan. Q. Júsipov atalmysh aýdarmanyń ereksheligi men mańyzdylyǵyna toqtaldy.
Fakýltettiń oqytýshysy tarıh ǵylymdarynyń doktory, professor qytaıtanýshy Muhamethan Nábıjan aýdarmanyń tarıhy, Qytaı Halyq Respýblıkasyndaǵy ádebı aýdarma isiniń damýy jaıly qundy málimetterden habardar etti. Qazirgi shyǵys tilderi kafedrasynyń meńgerýshisi fılologııa ǵylymdarynyń kandıdaty, dotsent U. Aljanbaeva men atalmysh kafedranyń oqytýshylary «Abaı joly» romanynyń qazaq ómiriniń fılosofııasy men entsıklopedııasy ekendigin aıtty.
Sonymen qatar tanystyrylym barysynda qazirgi jastardyń tárbıesi, kórkem ádebıettiń tulǵany qalyptastyrýdaǵy mańyzdylyǵy týraly sóz qozǵaldy.
