«Abaı joly» roman-epopeıasy aýdıokitabynyń tusaýy kesildi

Qytaıda 3000 danamen jaryq kórgen aýdıokitap eki bólimnen turady. «Anyq Abaı» dep atalatyn birinshi bólimde 14 bólimdi derekti fılm bar. Onda uly aqynnyń ósken ortasy men shynaıy ómiri jóninde naqtyly derekter mazmundalǵan. Avtory - Qasym Amanjoluly. Buryn osy kitaptyń birinshi bólimi «Qazaqstan» telearnasy arqyly kórermenge tanystyrylǵan.

Al ekinshi bólim kemeńger jazýshy Muhtar Áýezovtiń búkil álemge máshhúr bolǵan «Abaı joly» roman-epopeıasynyń tolyq nusqasy boıynsha daıyndalǵan. 80 saǵattan turatyn aýdıokitapty daıyndaýǵa Jánábil Smaǵululy, Muratbek Tesebaıuly, Manen Zeıneluly, Serik Ábiluly, Jeńisqan Núsipuly, Qaırat Nábıuly jáne t.b. azamattar atsalysqan.

Tusaýkeser rásimine aqyn, jazýshylar, óner qaıratkerleri sonymen qatar aýdıokitaptyń qurastyrýshylary -Serik Ábiluly men Qaırat Nábıuly arnaıy qatysty. Elimizdiń zııaly qaýymy aýdıokitaptyń dúnıege kelýimen shyn júrekten quttyqtap, kitapty shyǵarýǵa atsalysqan Qytaıdaǵy qandastarymyzǵa úlken rızashylyqtaryn bildirdi.

"Sizderdiń Muhtar Áýezov shyǵarmashylyǵyna kelýlerińiz jáne kitapty dál osy Abaı shyǵarmasyna arnaǵandaryńyzdyń ózi bir ǵajap dúnıe! Óıtkeni, Muhtar Áýezov barlyq jaǵynan qomaqty iz qaldyrǵan uly tulǵa, onyń tipti qysqa áńgimeleriniń ózi qundy. Al bul epopeıa qazaqty biraz jerge kótergen, álemdik ádebıettiń deńgeıine kirgizgen shyǵarma boldy, osyndaı shyǵarmany qadirlep, qazirgi elektrondyq formatqa ákelip shyǵarǵandaryńyz ıgilikti is, tyń dúnıe boldy",-dep atap ótti aqyn, jazýshy Áýezhan Qodar.

"Men Muhtar Áýezovtyń dárisin tyńdaǵan adammyn. Ol kisi bizdiń ýnıversıtette Abaıtanýdan dáris berdi. Men osy ýaqytqa deıin dúnıeniń talaı ǵalymdaryn tyńdadym, dúnıejúzin talaı araladym, batys pen shyǵys elderinde boldym, biraq Áýezovteı uly jazýshyny, Áýezovteı keremet oqıtyn dárisshini kezdestirgem joq. Onyń dárisine basqa JOO-nan qanshama stýdent kelip qatysatyn, dáristi tyńdaý úshin bizben ıyq tirestirip qatar otyratyn. Endi mine, onyń aýdıokitaby dúnıege kelip otyr. Úlken ıgi isti qolǵa alǵandaryńyzǵa myń alǵys aıtamyn",-dedi aqyn, shyǵystanýshy-ǵalym Ótegen Kúmisbaev.

Tusaýkeser rásimi barysynda jınalǵan qaýym aýdıokitap elimizde de satylymǵa tússe jaqsy bolar edi degen usynystaryn jetkizdi. Bul jóninde kitapty qurastyrýshy Qaırat Nábıuly: "Eger aldaǵy ýaqytta Qazaqstan Úkimeti tarapynan, ne úkimettik emes uıymdardan bul dıskini shyǵarýǵa usynystar túsip jatsa, biz kóbeıtip, basyp shyǵarýǵa ázirmiz",-dedi. Onyń aıtýynsha, aýdıokitap Shynjań halyq radıosynda dybysqa salynyp, Beıjińdegi ulttar dybys-keskin baspasynda basylyp, aýyl, aımaqtarǵa taratylǵan.

Shara byrysynda aýdıokitaptar Ortalyq kitaphana men Almaty qalasyndaǵy birneshe kitaphanalarǵa syıǵa tartyldy.

Serik Ábiluly QHR Altaı aımaǵynda týǵan. Aqyn, jazýshy, sazger óz qyzmetin qytaı-qazaq radıosynda ádebıet-kórkem óner bóliminen bastaǵan. Qazaq radıosynyń memlekettik birinshi dárejeli dıktory, jýrnalıst, ánshi «Darıǵa-aı», «Kúmis jebe», «Sholpan» kitaptarynyń avtory bolyp tabylady. Shámshi Qaldaıaqov atyndaǵy án festıvaliniń laýreaty, Shynjań jazýshylary qoǵamynyń alqa múshesi.

Qaırat Nábıuly QHR Tarbaǵataı aımaǵynda týǵan. Aǵartýshy, jýrnalıst, pýblıtsıst, bıznesmen. Otyzǵa tarta ǵylymı maqalalar men birneshe kitaptyń avtory. Onyń uly Abaıdyń 150 jyldyq mereıtoıyna arnalǵan «Abaı ata» dybys keskini men Muhtar Áýezovtiń 100 jyldyq mereıtoıynyń qarsańynda baspadan jaryq kórgen «Muhtar aǵa» atty esseler kitabyn kezinde oqyrmandar jyly qabyldaǵan.