«Abaı joly» epopeıasynyń vıdeosammarıi jaryq kórdi
Portal Muhtar Áýezovtiń «Abaı joly» roman-epopeıasynyń qysqasha mazmunyna doodle anımatsııaly vıdeosammarı daıyndady
Vıdeojoba QR Aqparat jáne qoǵamdyq damý mınıstrliginiń qoldaýymen jaryq kórip otyr.
«Abaı jolynyń» qysqasha mazmuny ár taraý boıynsha daıyndaldy. Tórt tomdyq epopeıa barlyǵy 28 taraýdan turady. Birinshi tomda 7 taraý, ekinshi tomda 8, úshinshi tomda 6, tórtinshi tomda 7 taraý bar. Ár vıdeosammarıdiń uzaqtyǵy – 12-15 mınýt. Vıdeosammarı – kitaptyń negizgi ıdeıasyn, mazmunyn vıdeo túrinde usyný.
«Óskeleń urpaqqa Abaı jádigerlerin nasıhattap, onyń eńbekterindegi izgi oılardy darytý asa mańyzdy. Bizdiń bul jobamyz kórermen kóńilinen shyǵyp, Abaıdy tanýǵa sebep bolady dep senemiz», - deıdi Aqparat jáne qoǵamdyq damý mınıstri Aıda Balaeva.
Kishkentaı kórermenderdiń nazaryn aýdartyp, kartınany qabyldaý qabiletin arttyrý úshin doodle anımatsııa stılinde usynyldy, dybystyq fon qosyldy. Joba jetekshisi – Ernar Almabek, sýretshisi – Tomırıs Esqalı, dybystaǵan – Shamshaddın Omarov.
Abaı joly« ár oqyǵan saıyn ózgeshe kúıge bóleıtin epopeıalyq roman. Shyǵarma mektep baǵdarlamasyna kirgenimen, oqýshylar keıipkerin kózge elestetip, emotsııa keship, mazmunyn este saqtaı bermeıdi. Tipti eresek adamdardyń ózderi de romannyń avtoryn bilýmen ǵana shekteledi.
Abaıdyń týǵan kúnine oraı biz tili de, mazmuny da kúrdeli shyǵarmanyń vıdeosammarıin daıyndadyq. Endi kórermen 28 taraýdyń mazmunymen sanaýly mınýttarda tanysa alady. Osylaısha kitapqa degen qyzyǵýshylyǵy oıanǵan olar kúnderdiń bir kúni tom-tomdy paraqtaıdy degen úmitimiz bar», - deıdi joba jetekshisi Ernar Almabek.
Mazmun mátinine shyǵarmanyń negizgi bólikteri tańdalyp, jazýshynyń tili men kórkemdik quraldary saqtalǵan. Shyǵarmanyń birinshi tomyndaǵy taraýlar ár dúısenbi saıyn Massaget TV YouTube-arnasynda jarııalanyp turady. Jobanyń aqparattyq seriktesi – Alash Media Group medıaholdıngi.
Búgin 10 tamyz, Qazaqstandaǵy Abaı kúnine oraı І tomnyń «Qaıtqanda» taraýy kórermen nazaryna usynylyp otyr.
