Abaı jazbalarynyń jańartylǵan transkrıptsııasy jaryq kórdi
ASTANA. KAZINFORM — M.Áýezov atyndaǵy Ońtústik Qazaqstan ýnıversıtetiniń «Muhtartaný» ǵylymı-zertteý ortalyǵy hakim Abaıdyń 180 jyldyǵyna oraı «ABAI. Múrseıit qoljazbalaryna súıenip jasalǵan transkrıptsııa» atty jańa ǵylymı eńbekti jaryqqa shyǵardy.
Qundy zertteý elimizdiń jetekshi baspalarynyń birinen 2000 dana taralymmen basylyp shyqty. Avtorlary – fılologııa ǵylymdarynyń kandıdaty, dotsent Aqjol Qalshabek jáne PhD doktorant Ázimhan Isabek. Jobanyń jaryqqa shyǵýyna Parlament Májilisiniń depýtaty Ardaq Nazarov demeýshilik kórsetip, bastamanyń keń aýdıtorııaǵa jetýine yqpal etti.
Ǵylymı eńbekte Abaı shyǵarmalarynyń negizgi kózi sanalatyn Múrseıit Bikiulynyń qoljazbalary tekstologııalyq jáne termınologııalyq turǵyda saralanyp, salystyrmaly túrde taldanǵan. Sonymen qatar, aqynnyń inisi Halıollaǵa jazǵan hatynyń túpnusqasy men transkrıptsııasy, sondaı-aq Abaı shyǵarmalaryn kóshirgen Rahym Jandybaev pen Orazke Ýaqbaıulynyń qoljazbalarymen salystyrý nátıjeleri qamtylǵan.
Eńbektiń taǵy bir qundylyǵy – Abaıdyń 1910 jyly jazylǵan qoljazbasynyń tolyq faksımıle nusqasynyń alǵash ret jarııalanýy.
Joba avtorlarynyń aıtýynsha, kitapqa Qazaqstannyń Memlekettik syılyǵynyń ıegeri, professor Mekemtas Myrzahmetuly retsenzııa jazyp, óz batasyn bergen. Avtor Ázimhan Isabektiń sózine súıensek, bul eńbek – uzaq jyldarǵa sozylǵan ǵylymı-zertteý jumysynyń nátıjesi.
– Abaı shyǵarmalaryn túpnusqa negizinde tolyq ári saýatty transkrıptsııalaý – uly jazýshy Muhtar Áýezovtiń kózi tirisinde arman etken isi bolatyn. Búginde sol murat oryndalyp otyr, – dedi ol.
Abaıdyń 180 jyldyq mereıtoıyna arnalǵan bul irgeli eńbek 712 betti quraıdy jáne abaıtaný salasyndaǵy mańyzdy jańalyq retinde baǵalanýda.
Aıta ketelik ıÝNESKO-nyń «Álem jady» baǵdarlamasyna Abaı qoljazbasyndaǵy «Qara sózder» kirýi múmkin.