Abaı jáne Ulytaý oblystarynda ınfraqurylym jetkiliksiz — Toqaev

ASTANA. KAZINFORM — Shaǵyn jáne orta bıznesti damytý arqyly jańa jumys oryndaryn ashýy qajet. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

— Meniń tapsyrmammen byltyr 2030 jylǵa deıin aımaqtardy damytýǵa arnalǵan tujyrymdama bekitildi. Basty maqsat — óńirler arasyndaǵy áleýmettik-ekonomıkalyq teńsizdikti azaıtyp, halyqtyń ál-aýqatyn arttyrý. Ótken jylǵy damý qorytyndysy týraly aıtar bolsaq, aımaqtardyń ekonomıkasy turaqty ósip-órkendep keledi. Biraq sheshimin tappaǵan máseleler bar. Aımaqtardyń ınfraqurylymmen qamtylý deńgeıi ortasha eseppen alǵanda — 64,1 paıyz. Bul kórsetkish ár óńirde ártúrli, aıtarlyqtaı alshaqtyq bar, — dedi Qasym-Jomart Toqaev.

Prezıdenttiń paıymynsha, qajetti ınfraqurylymnyń bolmaýy oblystardyń damýyna jáne halyqtyń turmys sapasyna keri áserin tıgizip otyr. Ásirese, jańadan qurylǵan Abaı jáne Ulytaý oblystarynda ınfraqurylym jetkiliksiz. Almaty oblysynda da ahýal máz emes.

— Bul aımaqtardyń damýyna aıryqsha nazar aýdarý qajet. Aımaq basshylary ekonomıkany ártaraptandyrýǵa jáne azamattardyń tabysyn arttyrýǵa basa mán berýge tıis. Inflıatsııany tómendetý úshin tıimdi sharalar qabyldap, sapaly ınvestıtsııa tartýy kerek, shaǵyn jáne orta bıznesti damytý arqyly jańa jumys oryndaryn ashýy qajet, — dedi Memleket basshysy.

Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.