Abaı-Vern: 35 qazaqstandyq magıstrant pen doktorant Frantsııada tegin oqı alady
Baǵdarlama boıynsha 30-dan astam qazaqstandyq magıstrant pen doktorant Frantsııada tegin bilim ala alady.
Utqyrlyq baǵdarlamasy koronavırýs pandemııasyna baılanysty moratorıı engizilgennen keıin bir jyl ótken soń qaıta júzege asyryla bastady.
Bilim jáne ǵylym mınıstri Ashat Aımaǵambetov pen Frantsııanyń Qazaqstandaǵy elshisi Dıde Kaness franko-qazaqstandyq stıpendııa týraly kelisimge ózgerister engizý týraly hattamaǵa qol qoıdy.
2021-2022 oqý jylynda ekinshi kýrstyń 30 magıstranty jáne Qazaqstan men Frantsııadaǵy ǵylymı jetekshilermen birlesip dıssertatsııa daıyndaıtyn 5 doktorant «Abaı-Vern» stıpendııasynyń ıegeri atana alady.
«Abaı-Vern» stıpendııasy magıstranttar men doktoranttarǵa frantsýz jáne aǵylshyn tilderinde Frantsııa ýnıversıtetterinde oqý úshin beriledi. Úmitkerlerdiń frantsýz joǵary oqý ornyna nemese ǵylymı-zertteý ortalyǵyna magıstratýra men doktorantýra baǵdarlamalary boıynsha oqýǵa aldyn ala qabyldanǵany týraly rastaý haty bolýy tıis», - dep atap ótti QR BǴM Halyqaralyq yntymaqtastyq departamenti dırektorynyń m.a. Elmıra Asan.
«Abaı-Vern» stıpendııasyn jeńip alǵan magıstranttarǵa Ulttyq bank baǵamy boıynsha aı saıyn 800 evro, doktoranttarǵa 1200 evro mólsherinde stıpendııa tólenedi.
Sondaı-aq stıpendıattar Frantsııadaǵy ýnıversıtet jataqhanasynda oryn alýǵa artyqshylyqqa ıe bolyp, uzaqmerzimdi stýdenttik vıza jáne frantsýz áleýmettik saqtandyrý júıesine tegin tirkele alady.
«Abaı-Vern» akademııalyq utqyrlyq baǵdarlamasy boıynsha qujat qabyldaý 4 shildege deıin jalǵasady. Kandıdattardy irikteýdi franko-qazaqstandyq táýelsiz komıssııa júrgizedi.
«Abaı-Vern» - QR Bilim jáne ǵylym mınıstrligi men Frantsııanyń Eýropa jáne syrtqy ister mınıstrliginiń birlesken stıpendııalyq baǵdarlamasy.
Kelisimge qol qoıylǵan kezden bastap 158 qazaqstandyq magıstrant pen doktorant bedeldi «Abaı-Vern» halyqaralyq stıpendııasynyń ıegeri atanǵan.
