Abaı Ulttyq mektebi jańa ǵımaratynyń qazyǵy qaǵyldy
ASTANA. KAZINFORM — Prezıdenttiń tapsyrmasymen Abaı atyndaǵy respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn orta mektep-ınternatynyń jańa ǵımaratynyń qurylysyn bastaý rásimi ótti, dep habarlaıdy Oqý-aǵartý mınıstrliginiń baspasóz qyzmeti.
Oǵan Qazaqstan Respýblıkasy Parlamenti Senatynyń tóraǵasy Máýlen Áshimbaev, oqý-aǵartý mınıstri Ǵanı Beısembaev, Almaty qalasynyń basshylyǵy, «Qazaqstannyń Eńbek Erleri» A.Mırazova, G.Nurpeıisova, A. Jumadildaev, Parlament jáne máslıhat depýtattary, ardagerler, zııaly qaýym men pedagogıkalyq qaýymdastyq ókilderi qatysty.
Senat Spıkeri Máýlen Áshimbaev óz sózinde Abaı atyndaǵy mekteptiń jańa ǵımaratyn salý orta bilimniń ulttyq brendin qalyptastyrýǵa qosylǵan úlken úles ekenin aıtty.
Sondaı-aq Palata tóraǵasy bul qadam qoǵamda ulttyq múddeni berik ornyqtyrý jáne tarıhı sabaqtastyqty saqtaý úshin qajet ekenine nazar aýdardy.
Esterińizge sala keteıik, Memleket basshysy Qasym-Jomart Toqaev 2020 jyly Semeı óńirinde abaıtanýshy ǵalymdarmen kezdesýinde Abaı atyndaǵy respýblıkalyq mektep-ınternatyn zamanaýı talapqa saı jetildirip, eń úzdik bilim ordasyna aınaldyrý, gýmanıtarlyq salany damytý, onyń ishinde qazaq tili men ádebıetin oqytýǵa basa mán berý týraly tapsyrma bergen bolatyn. Osy maqsatta búgingi tańda Abaı atyndaǵy respýblıkalyq qazaq tili men ádebıetin tereńdete oqytatyn mektep-ınternatyn «Abaı ulttyq mektebine» transformatsııalaý tujyrymdamasy jasalýda.
Sondaı-aq Prezıdent bastamasymen elimizde gýmanıtarlyq pánderdi tereńdetip oqytatyn Abaı atyndaǵy mektepter men mektep-ınternattar jelisi damýda. Jańa ǵımarattyń alǵashqy qazyǵyn qaǵý rásiminde sóz sóılegen oqý-aǵartý mınıstri Ǵanı Beısembaev Abaı ulttyq mektebiniń bolashaqta barlyq mekteptiń kóshin bastaıtyn úlgili bilim oshaǵyna aınalatynyna senim bildirdi.
«Memleket basshysy ana tilimiz ben tól ádebıetimizdiń qadir-qasıetin balalarǵa mektep jasynan bastap sińirýdi, bul baǵytta biryńǵaı ustanym ázirleýdi tapsyrdy. Abaı mektepteri jelisi úshin birtutas «ABAY-Programme» baǵdarlamasyn ázirleý qolǵa alyndy. Respýblıkalyq Abaı mektebin transformatsııalaý arqyly biz til men ádebıetti tereńdetip oqytyp qana qoımaı, elimizdiń bolashaq ıntellektýaldy áleýetin qalyptastyrýǵa qadam jasaımyz. Abaı ulttyq mektebi — Memleket basshysynyń «Adal azamat» tujyrymdamasy men Abaıdyń «Tolyq adam» iliminen taǵylym alǵan, zamanaýı bilim berý keńistiginde básekege qabiletti, patrıot jastardyń kıeli bilim uıasyna aınalýy tıis», — dedi oqý-aǵartý mınıstri Ǵanı Beısembaev.
Aıta keteıik, qurylysy bastalǵan jańa ǵımarat nysany 900 oqýshy ornyna arnalǵan. Onyń ınfraqurylymynda mektep-pansıon, muǵalimder úıi, kitaphana, ABAY-arena sport kesheni, jylyjaı aýmaqtary jáne taǵy basqa qurylys nysandary qarastyrylǵan. Bilim uıymyn 2025 jyly qyrkúıekten bastap qoldanysqa berý josparlanǵan.
Buǵan deıin mınıstrlik tárbıeshilerdiń ortasha aılyǵy qansha teńge kóleminde ekenin aıtqan bolatyn.
