Abaı ulttyq mektebi tóńiregindegi daýdan keıin mınıstr pedagog jáne oqýshylarmen kezdesti
ASTANA. KAZINFORM — Juldyz Súleımenova «Abaı ulttyq mektebiniń» túlekterimen, pedagogterimen jáne oqýshylarymen kezdesti.
Oqý-aǵartý mınıstriniń m. a. Juldyz Súleımenova Almatyǵa kelip, «Abaı ulttyq mektebine» bardy.
Aldymen Juldyz Súleımenova mektep túlekterimen kezdesti. Olardyń arasynda jýrnalıster, aıtyskerler men belgili qoǵam qaıratkerleri boldy. Kezdesý ashyq suraq-jaýap formatynda ótti. Túlekter sońǵy kúnderi áleýmettik jelilerde mektepke qatysty kóterilgen barlyq saýaldy tikeleı qoıdy. Aýdıt qorytyndysy, mektep basshylyǵyndaǵy ózgerister jáne oqý protsesiniń qazirgi jaǵdaıy sóz boldy. Juldyz Súleımenova árbir saýaldy ashyq ári tolyq talqylady.
Budan keıin mektep pedagogterimen kezdesý ótti. Ujym músheleri oqý protsesin uıymdastyrý, mekteptiń kúndelikti jumysy jáne ózderin tolǵandyrǵan ishki máseleler boıynsha suraqtaryn qoıdy. Juldyz Súleımenova pedagogterdiń pikirleri men usynystaryn tyńdap, kóterilgen máselelerdi ujymmen birge jan-jaqty talqylady.
Kezdesýlerden keıin Juldyz Súleımenova mektep ǵımaraty men jataqhanany aralap, balalardyń oqýyna jáne turýyna jasalǵan jaǵdaımen tanysty. Oqýshylarmen áńgimelesip, olardyń oqý barysy men mekteptegi ómiri týraly pikirlerin tyńdady.
Búginde «Abaı ulttyq mektebi» shtattyq rejımde jumys istep, oqý protsesi qalypty jalǵasyp jatyr.
Aıta ketelik Almatyda ornalasqan Abaı ulttyq mektebi tóńireginde daý týyndaǵany jóninde jazǵan edik.
